हामी सबैकाे संसारन्यूज

काठमाडौं । बेलायत र युएई पठाइदिन्छु भनेर २२ लाख बढी ठगी गर्ने २ जना पक्राउ परेका छन् ।

काठमाडौं महानगरपालिका–२९ सामाखुसी बस्ने ईलाम, ईलाम नगरपालिका–१ नारायणटार घर भएका ३७ वर्षीय प्रकाश राईलाई आइतबार दिउँसो प्रहरीले पक्राउ गरेको छ ।

राईले ५ जनालाई सिजनल भिषामा बेलायत जानको लागि प्रति व्यक्ति नगद ९ लाख रुपैयाँ लाग्ने र बेलायत पुगेपछि प्रतिष्ठित एग्रिकल्चर कम्पनीमा काम लगाइदिन्छु भनेर ठगी गरेको आरोपमा पक्राउ परेका हुन् ।

उनले बेलायतमा मासिक नगद ४ लाख रुपैयाँसम्म तलव हुन्छ भनी प्रलोभनमा पारेर उनीहरूबाट प्रतिव्यक्ति ३ लाख गरी जम्मा १५ लाख लिएर सम्पर्क बिहीन भएको अवस्थामा प्रहरीले सिनामंगलबाट पक्राउ गरेको हो ।

त्यसैगरी दुबई पठाईदिन्छु भनेर ठगी गरेको आरोपमा सिन्धुपाल्चोक सुनकोशी गाउँपालिका–७ खाडिचौर घर भई टोखामा बस्ने २७ वर्षीय अविनाश कार्कीलाई आइतबार दिउँसो प्रहरीले पक्राउ गरेको छ ।

दैलेख दुल्लु घर भएका एक पुरूषलाई वर्किङ भिषामा दुबई जानको लागि ७ लाख ५० हजार रूपैयाँ लाग्ने र दुबई पुगेपछि प्रतिष्ठित कम्पनीमा आर्मस् गार्डको काम लगाईदिन्छु भनेर ठगी गरेको आरोपमा कार्की पक्राउ परेका हुन् ।
उनले मासिक १ लाख रूपैयाँसम्म तलव हुन्छ भनी विश्वास दिलाई प्रलोभनमा पारी पीडित व्यक्तिबाट ७ लाख ५० हजार रुपैयाँ लिएर भागेका थिए । प्रहरीले उनलाई काठमाडौंको गोङ्गबुबाट पक्राउ गरेको हो ।

पक्राउ परेका दुवैजनालाई थप अनुसन्धान तथा कारवाहीको लागि वैदेशिक रोजगार विभाग बुद्धनगर काठमाडौँ पठाइएको प्रहरीले जनाएको छ ।