हामी सबैकाे संसारन्यूज

काठमाडाैं । प्रधानमन्त्री एवम् कांग्रेस सभापित शेरबहादुर देउवाले आगामी मंसिर ४ गते तय भएको आम निर्वाचनमा गठबन्धनका उम्मेदवारलाई जिताउने गरी खटिन स्थानीय तहका जनप्रतिनिधिहरूलाई निर्देशन दिएका छन् । सोमबार पार्टीका तर्फबाट स्थानीय तहका जनप्रतिनिधिहरुको अभिमुखीकरण कार्यक्रममा देउवाले सत्तारुढ दलहरुबीच गठबन्धन हुने सहमति बनिसकेको भन्दै सोहीअनुसार लागि पर्न देउवाको निर्देशन दिए ।

गठबन्धनकै बलमा स्थानीय निर्वाचनमा कांग्रेसले राम्रो नतिजा हात पारेको उल्लेख गर्दै देउवाले अब पार्टीको ध्यान मंसिर ४ तर्फ केन्द्रीत रहेको बताए ।

‘स्थानीय निर्वाचनमा कांग्रेसले राम्रो नतिजा हात पारेको थियो । अब हाम्रो ध्यान मंसिर ४ मा छ । मंसिर ४ मा हुने प्रदेश र प्रतिनिधिसभा निर्वाचनका राम्रो परिणाम आउनेछ’, देउवाले भने, ‘स्थानीय निर्वाचनमा पनि गठबन्धन गरेर जाँदा राम्रो परिणाम आएको थियो । अब पनि गठबन्धन गरेर जाने दलहरूबीच सहमति भइसकेको छ । गठबन्धनलाई सँगै सँगै लिएर जानुछ । गठबन्धनका उम्मेदवारलाई विजयी गराउने गरि चुनावी तयारीमा लाग्नुस् ।’

देउवाले उम्मेदवारी दिनेभन्दा पनि जित महत्वपूर्ण रहेको कुरालाई मनन गर्न पनि आफ्ना कार्यकर्तालाई आग्रह गरे। ‘उम्मेदवारी सबै ठाउँमा दिनेभन्दा पनि कति ठाउँमा जित्ने भन्ने कुरा महत्वपूर्ण छ,’ देउवाले भने, ‘यसलाई विषयलाई मनन गरेर पार्टीका सम्पूर्ण साथीहरू अघि बढ्न आग्रह गर्दछु।’