हामी सबैकाे संसारन्यूज

काठमाडौँ । चर्को विरोधका बाबजुद पनि नियामक निकाय बिमा समितिले लघुबिमा कम्पनीको लाइसेन्स वितरण गर्ने भएको छ । बिमा कम्पनीको संख्या धेरै भएको भन्दै मर्जर तथा एक्विजिसनका लागि बिमा कम्पनीहरूलाई दबाब दिँदै आएको बिमा समितिले सातै प्रदेशमा लघु बिमाका नाममा इजाजतपत्र वितरणका लागि शुक्रबार सार्वजनिक रुपमा सूचना जारी गरेको छ ।

इजाजतपत्र खुलाउने प्रयोजनका लागि समितिले गत सोमबार ‘लघु बिमक संस्थापना तथा दर्तासम्बन्धी निर्देशिका, २०७९’ जारी गरेको थियो । निर्देशिकामा जीवन र निर्जीवन लघु बिमा कम्पनीसम्बन्धी व्यवस्था थपिएको छ, जसले नयाँ कम्पनीहरूलाई इजाजत दिने बाटो खुला गरिदिएको थियो ।

सूचनामा हरेक प्रदेशमा बढीमा एउटा (जीवन लघु बिमा वा निर्जीवन लघु बिमा) लघु बिमा कम्पनी स्थापना हुने गरी आवेदन आह्वान गरिएको छ । जसअनुसार चार वटा निर्जीवन लघु बिमा र तीन वटा जीवन लघु बिमा गरेर सात कम्पनीलाई नयाँ अनुमतिपत्र वितरण गरिने उल्लेख छ ।

नयाँ कम्पनीको न्यूनतम चुक्ता पुँजी ७५ करोड तोकिएको छ । प्रस्तावित नयाँ कम्पनीले गर्ने व्यवसाय लघुबिमा तर्फको जीवन बिमा वा निर्जीवन बिमा व्यवसाय मध्ये कुनै एक वा छुट्टा छुट्टै वा दुवै प्रस्ताव गर्न सकिने व्यवस्था सूचनामा छ ।