Sansar News
काठमाडौं । काठमाडौं महानगरले न्यूरोडस्थित व्यापारिक भवन सुरज अर्केडको बेसमेन्टमा राखिएका पसलहरू खाली गराउन थालेको छ ।
अनधिकृत रुपमा सञ्चालनमा रहेका पसलहरु महानगरको टोली पुगेपछि हटाउन सुरु गरिएको हो । अहिले व्यापारी स्वयम्ले धमाधम पसल खाली गरिरहेका छन् ।
पसल खाली गरेपछि अवैध संरचना भत्काउने महानगरको तयारी छ ।
महानगरले गत साउन २ मा पार्किङ्गका लागि भनेर स्वीकृत गरिएका बेसमेन्ट, सेमीबेसमेन्ट, भूइँतलालाई अन्य प्रयोजनमा प्रयोग गरेको पाइएपछि ३५ दिने सूचना निकालेर खाली गर्न निर्देशन गरेको थियो । तर, सूचनालाई बेवास्ता गरेको पाइएपछि महानगर आफैंले त्यस्ता संरचना हटाउन लागिपरेको हो ।
महानगर प्रमुख बालेन्द्र शाहको नेतृत्वमा गत सोमबारदेखि नयाँ बानेश्वरबाट बेसमेन्ट खाली गर्ने अभियान चलाइएको थियो ।
वि.सं.२०७९ भदौ १३ सोमवार १२:११ मा प्रकाशित
