हामी सबैकाे संसारन्यूज

ऐजेन्सी । टाउकोमा ताकिएको गोली संयोगवश नपड्किएपछि अर्जेन्टिनाकी उपराष्ट्रपति बाँचेकी छन् ।

दक्षिण अमेरिकी देश अर्जेन्टिनाकी उपराष्ट्रपति क्रिस्टिना फर्नान्डेज डि क्रिच्नरमाथि बिहीबार एक कार्यक्रममा आफ्ना समर्थकहरुसँग भेटघाट गरिरहेका बेला अज्ञात व्यक्तिले कन्चटमै गोली ताकेका छन् । तर उक्त गोली नपड्किएपछि उनी बच्न सफल भएको भिडियो सार्वजनिक भएको छ ।

समाचार ऐजेन्सी रोयटर्सका अनुसार राजधानी ब्युनस आयर्समा रहेको आफ्नै निवासमा समर्थकहरूसँग भेटिरहेकी उपराष्ट्रपति क्रिस्टिना फर्नान्डेज बिहीबार आफुमाथि लागेको भ्रष्टाचार मुद्दामा बयान दिएर फर्किएकी थिइन् ।

दुईपटक अर्जेन्टिनाकी राष्ट्रपति भइसकेकी उपराष्ट्रपति क्रिस्टिनाको हत्या प्रयासको घटनालाई लिएर राष्ट्रपतिल एल्बर्टो फर्नान्डिजले निन्दा गरेका छन् ।

त्यो मान्छेले क्रिस्टिनाको टाउकोमा पेस्तोल ताक्यो र ट्रिगर तान्यो । क्रिस्टिना अहिले जिवित छिन् किनभने केही कारणले पेस्तोल पड्किएन’ टेलिभिजन सम्बोधनका क्रममा एल्बर्टोले भनेका छन् ।

उपराष्ट्रपति क्रिस्टिना फर्नान्डेज माथि गोली ताक्ने ३५ वर्षीय ब्राजिलियन मूलका पुरूषलाई हिरासतमा लिएर अनुसन्धान गरिरहेको बताइएको छ ।