हामी सबैकाे संसारन्यूज

ब्रसेल्स । युरोपेली सङ्घ (ईयू) ले युद्धग्रस्त युक्रेनसँग आवास, शिक्षा र कृषिमा सहयोग पु¥याउन थप ५० करोड युरो (४९ करोड ७० लाख अमेरिकी डलर) को योजनाबद्ध सहयोग उपलब्ध गराउने सम्झौतामा हस्ताक्षर गरेको छ ।

युरोपेली सङ्घको कार्यकारी निकाय युरोपेली आयोगले युक्रेनका प्रधानमन्त्री डेनिस श्मीगलसँग ब्रसेल्समा ईयू–युक्रेन एसोसिएसन काउन्सिलको बैठक आयोजना गरेपछि उक्त राहतको घोषणा गरेको हो ।

प्रवक्ता एरिक मामेरले भने, “ईयूको यो अनुदान कोषले आन्तरिक रूपमा विस्थापित व्यक्तिहरू र फर्केकाहरूका लागि आवास र शिक्षा सुनिश्चित गर्न र युक्रेनको कृषि क्षेत्रलाई समर्थन गर्न मद्दत गर्नेछ ।

सहायताको नवीनतम् स्लाइसको अतिरिक्त – अप्रिलमा सुरु भएको ठूलो समर्थन कार्यक्रमको भाग – युक्रेनले उच्च–टेक प्रशिक्षण र उद्योगको विकास गर्न ईयू डिजिटल अर्थ व्यवस्था कोषमा पनि आवेदन दिन सक्षम हुनेछ ।

गत फेब्रुअरीमा रूसले आक्रमण गरेको युक्रेनलाई युरोपेली सङ्घमा सामेल हुन औपचारिक उम्मेदवारका रूपमा स्वीकार गरिएपछि एसोसिएसन काउन्सिलको सोमबारको बैठक पहिलो हुनेछ ।

ब्रसेल्स बैठकको अध्यक्षता युरोपेली सङ्घका विदेश नीति प्रमुख जोसेप बोरेल र युरोपेली सङ्घ विस्तार समितिका आयुक्त ओलिभर भार्हेलीले गरिरहेका थिए ।

पूर्ण सदस्यता प्राप्त गर्न वर्षौं लाग्न सक्छ । ईयू र यसका अधिकांश सदस्य राष्ट्रहरूले रूसविरुद्ध हतियार, आर्थिक सहायता र प्रतिबन्धहरू प्रदान गरेर मस्कोसँग कीभको सङ्घर्षलाई समर्थन गरिरहेका छन् ।

“हाम्रो वर्तमान प्राथमिकताहरूमध्ये रूसविरुद्ध पूर्ण ऊर्जा प्रतिबन्धको सुरुआत हो,” शमिगलले आफ्नो टेलिग्राम सन्देशमा भने । उनलाई ईयू मुख्यालयमा भव्य स्वागत गरिएको थियो ।

“युक्रेनमा ग्यासको सबैभन्दा ठूलो भूमिगत भण्डार छ र यो युरोपको ग्यास बैंक बन्न सक्छ,” उनले भने । “उम्मेदवार देशको स्थिति प्राप्त गरेपछि, सरकार ईयू ऊर्जा बजारमा एकीकरणलाई गति दिन चाहन्छ ।”(रासस/सिन्ह्वा)