हामी सबैकाे संसारन्यूज

काठमाडौं । सत्ता गठबन्धनमा सीट बाँडफाँट निकै सकसपूर्णं देखिएको छ । सीट बाँडफाँटका लागि बनाएको कार्यदलले अपुरो प्रतिवेदन बुझाएसँगै शीर्ष नेताहरु नै बाँडफाँट गर्न छलफलमा जुटेका छन् । तर, कार्यदलमा देखिएको पेचिलो छलफल शीर्ष तहमा पनि देखिएको छ ।

नेताहरुले निर्णायक भनि केही सातादेखि छलफलमा जुटेपनि निष्कर्ष निस्कन सकेको छैन ।

सोमबार बिहानैदेखि छलफल भएपनि बाँडफाँटबारे सहमति निस्केको छैन । बिहान ८ बजेदेखि छलफलमा जुटेका नेताहरु लञ्च पछि पनि छलफलमा जुटेका छन् । तर, एक नेताले बताएअनुसार छलफलमा नेताहरुको अडान साबिककै भन्दा बाहिरबाट छैन ।

“सहमति खोजौं भन्ने हो, तर विषय सहज छैन”, गठबन्धनका एक नेताले भनेका छन्, “यसअघि कै अडानभन्दा बाहिरबाट छलफल हुन सकेको छैन ।”

१६५ स्थानीय तहमध्ये कांग्रेसले १००, माओवादी केन्द्रले ६०, एकीकृत समाजवादीले ४०, जसपाले ३२ र राजमोले २ सीटको दाबी गरेका छन् । सीट संख्या भन्दा बढी दाबी गरेपनि दलहरुबीच बाँडफाँटको मोडालिटीमा सहमति छैन । मोडालिटीमा सहमति नभएकै कारण कार्यदलले अपुरो प्रतिवेदन बुझाएको थियो ।

दलहरुबीच ०७४ को प्रतिनिधिसभा र ०७९ को स्थानीय निर्वाचन कुनलाई बाँडफाँटको आधार बनाउने अन्योल छ । कांग्रेसले स्थानीय तहको निर्वाचनलाई आधार बनाउनुपर्नेमा देखिएको छ भने अन्य दल प्रतिनिधिसभा र स्थानीय तह दुवैलाई आधार बनाउनुपर्नेमा छन् ।