हामी सबैकाे संसारन्यूज

काठमाडौं । नेपाल समाजवादी पार्टीका अध्यक्ष डा. बाबुराम भट्टराईले फुटपाथमा व्यवसाय गर्नेहरुका बारेमा बैकल्पिक व्यवस्था गर्न माग गरेका छन् ।

पूर्वप्रधानमन्त्री समेत रहेका डा. भट्टराईले महानगरका मृतप्रायः बनेका नदीलाई काठमाडौं महानगरका मेयर बालेन्द्र शाहले पुनर्जीवन दिएकोमा प्रशंसा गर्दै वेरोजगार श्रमिकहरू फुटपाथ वा सार्वजनिक ठाउँमा व्यवसाय गर्न बाध्य भएकाहरुलाई बैकल्पिक व्यवस्था गर्नैपर्ने बताएका छन् ।

‘काठमाडाैं मनपालाई व्यवस्थित गर्ने, मृतप्रायः बनेका नदीलाई पुनर्जीवन दिने आदि मेयरका पहल प्रशंसनीय छन् । फुटपाथ पनि व्यवस्थित गर्नुपर्छ । तर, संसारभर स्वरोजगार श्रमिकहरू फुटपाथ वा सार्वजनिक ठाउँमा व्यवसाय गर्न बाध्य हुन्छन् । अतःनिश्चित ठाउँ /समय तोकेर तिनको व्यवस्थापन गर्नैपर्छ !’ डा. बाबुराम भट्टराईले सामाजिक संजालमा लेखेका छन् ।

डा. भट्टराईको उक्त सुझावलाई मेयर बालेन साहले पनि सामाजिक संजालमार्फत् नै जवाफ फर्काएका छन् । उनले कमेन्टमा लेखेका छन्–‘यो कुरा त तपाईंले हजारौंको घर भत्काएर फुटपाथ बनाउँदा पनि सोच्न पर्थ्याे नि ।’