हामी सबैकाे संसारन्यूज

काठमाडौं । रुपन्देही–१ मा नेकपा (एमाले)का पूर्वउपमहासचिव घनश्याम भुसाल र वर्तमान सचिव छबिलाल विश्वकर्माबीच चुनावी प्रतिस्पर्धा हुने भएको छ । एमाले परित्याग गरि स्वतन्त्र उम्मेदवारी दिएका भुसाललाई सत्ता गठबन्धनले सघाउने छ भने एमाले सचिव विश्वकर्मालाई राप्रपा र जसपाको समर्थन छ ।

हिजोका सहकर्मी र एमाले पृष्ठभूमिका नेताबीचको प्रतिस्पर्धा रोचक रुपमा हेरिएको छ । दुवैले आफुँले जित्ने दाबी गरेका छन् । भुसालले सांगठनिक रुपमा आफ्नो पकड भएको दाबी गरेका छन् भने विश्वकर्माले सिंगो एमाले आफ्नो पक्षमा रहेको दाबी गरेका छन् ।

एमाले सचिव विश्वकर्माले सोही क्षेत्रबाटै २०७४ को निर्वाचन जितेका थिए । उनले २०७४ देखि आफुँले उक्त क्षेत्रलाई आधार बनाएर काम गरेको कारण आगामी निर्वाचन आफ्नो पक्षमा पर्ने दाबी गर्दै आएका छन् ।

यता भुसाल भने २०७४ को निर्वाचनमा रुपन्देही–३ बाट विजयी भएका थिए । उनले अहिले चुनावी क्षेत्र परिवर्तन गरेका हुन् । तथापी रुपन्देही–३ भन्दा १ मा आफ्नो पक्षमा माहोल रहेको भुसालको बुझाई छ । सिंगो गठबन्धन र विभाजित एमालेको ठूलो पंक्ति आफ्नो पक्षमा उभिएको भुसालको दाबी छ । गठबन्धनमा भागवण्डा गर्दा आफ्नो भागमा परेको माओवादीले भुसाललाई पूर्णं समर्थन गरेको छ । माओवादीले भुसाललाई समर्थन गर्दै उम्मेदवारी नै दिएको छैन ।

मतको लेखाजोखा गर्दा को बलियो ?

२०७४ को प्रतिनिधिसभा निर्वाचनमा रुपन्देही–१ मा एमाले सचिव छबिलाल विश्वकर्मा झण्डै ८ हजार मत बढीले विजयी भएका थिए । ३४ हजार १५१ मत ल्याएर विश्वकर्मा विजयी हुँदा कांग्रेसले अब्दुल रज्जाकले २६ हजार ७ सय ७१ मत ल्याएका थिए ।

२०७४ को प्रतिनिधिसभा निर्वाचनको मतपरिणामलाई हेर्दा एमाले बलियो देखिन्छ । तर, पछिल्लो स्थानीय तहको निर्वाचनको परिणाम हेर्दा रुपन्देही १ मा कांग्रेस सबैभन्दा बलियो छ ।

गत वैशाखमा सम्पन्न स्थानीय तहको निर्वाचनमा कांग्रेसले ३२ हजार ९९९ मत पाएको थियो भने एमालेले ३० हजार ३९४ मत पाएको थियो । सो क्षेत्रमा राप्रपा तेस्रो शक्तिको रुपमा देखिएको छ । राप्रपाले १४ हजार ५५२ मत पाएको छ । त्यसैगरि जसपाले ६ हजार ६९५, माओवादी केन्द्रले ४ हजार २०२, नेकपा एसले १ हजार २४३ र लोसपाले ३२५ मत पाएका छन् ।

भुसालको उम्मेदवारीसँगै रुपन्देही–१ मा एमालेको मत विभाजन हुन्छ । एमालेको मत भुसालले बढी तान्छन् वा विश्वकर्माले भन्ने यकिन छैन तथापी भुसालको पक्षको गठबन्धनको भने मत आउनेछ । भुसाललाई विभाजित एमाले र सत्ता गठबन्धनको मत प्राप्त हुनेछ ।

तर, रुपन्देही–१ मा एमाले उम्मेदवारलाई राप्रपा र जसपाले सघाएको कारण कसको पक्षमा कति मत हुन्छ यकिनपूर्वक भन्न सकिन्न । तथापी मतको हिसाबले एमालेका उम्मेदवारभन्दा विद्रोही भुसाललाई सहज हुने देखिन्छ ।