हामी सबैकाे संसारन्यूज

झापा । एमाले अध्यक्ष केपी शर्मा ओलीले राप्रपा अध्यक्ष राजेन्द्र लिङ्देनका लागि भोट मागेका छन् । आगामी ४ मंसिरमा हुने प्रतिनिधिसभा सदस्य निर्वाचनका लागि झापा ३ बाट उम्मेदवारी दिएका लिङ्देनका लागि ओलीले भोट मागेका हुन् ।

शुक्रबार झापा–३ मा आयोजित कार्यक्रममा अध्यक्ष ओलीले लिङ्देनका लागि भोट मागेका हुन् । लिङ्देनकाे उम्मेदवारी राष्ट्र हितको पक्षमा भएको उनले बताए । देशद्रोहीलाई रोक्न हलोमा भोट हाल्न पर्ने बताएका ओलीले विशेषगरी सत्तारुढ गठबन्धनका उम्मेदवारलाई पराजित गर्नुपर्ने बताए ।
‘यो सहकार्य राष्ट्रिय हितको पक्षमा रहेको छ । मैले प्रचण्डलाई पनि लिएको थिएँ । तर ड्रमका ड्रम पानी सकिए, डल्लाका डल्ला साबुन सकिए । जति धोयो, जति पखाल्यो जस्ताको त्यस्तै,’ ओलीले भने, ‘माधवकुमार नेपाल र झलनाथ खनाललाई दशकौं साथमा लिएर हिडेँ । प्रचण्डलाई मिलाएर हेरेँ तर देशको हितमा कहिल्यै पनि काम गरेनन् ।’

अध्यक्ष ओलीले एमसीसी र एसपीपीको सन्दर्भ स्मरण गराउँदै सत्ता गठबन्धन दलका नेताहरू सत्ता बचाउनका लागि जे पनि बेचिदिन्छु भन्नेहरु भएको आरोप लगाए । यस क्रममा उनले आगामी मंसिर ४ गते हुने निर्वाचनका लागि राप्रपाका उम्मेदवारको पक्षमा पनि मत मागेका थिए ।

आफ्ना नेता कार्यकर्तालाई एमालेले समर्थन गरेका उम्मेदवारलाई जिताउनुपर्ने भन्दै भोट दिन निर्देशन दिएका उनले यसपटक राप्रपा राष्ट्रिय पार्टी बन्नेसमेत दाबी गरे ।