हामी सबैकाे संसारन्यूज

लन्डन । गैरआवासीय नेपाली संघ (एनआरएनए) यूकेका अध्यक्ष प्रेम गाहामगरलाई अध्यक्षबाट वर्खास्त भएको भनि केन्द्रका महासचिव गौरीराज जोशी र डा. केशव पौडेलले पठाएको पत्र नक्कली भएको बताइएको छ ।

श्रोतका अनुसार, उक्त पत्र पठाउन कार्यकारीको कार्यकाल सकिएका एनआरएनए अध्यक्ष कुल आचार्यको दवावमा रामशरण सिम्खडाले ड्राफ्ट गरि गौरी र केशवले पठाएको पाइएको गाहा मगर पक्षले आरोप लगाएको छ ।

वर्खास्त गरिएको ब्यहोराको पत्र लेख्नुअघि कार्यकारी अध्यक्ष रविना थापासंग विमर्श नगरिएको र कार्यसमितिमा समेत छलफल नगरिएको बताइएको छ । कार्यकारी अध्यक्ष रविना थापाले आफूलाई यसबारे केही थाहा नभएको सार्वजनिक कार्यक्रममै बताइसकेको पनि गाहामगर पक्षले जनाएको छ ।

वर्खास्त गरिएको भनि एकजना जननिर्वाचित अध्यक्षलाई मानमर्दन गरिएको र संस्थाको प्रतिष्ठा समेत धुमिल पारिएको भन्दै गाहामगरले यो विषयलाई चर्काउने र आफ्नो लडाई अब केन्द्रसँग हुने बताएका छन् ।

गाहामगरले एनआरएनए यूकेको गत ६ अगष्टमा सम्पन्न वार्षिक साधारणसभाले दिएको म्याण्डेट बमोजिम गठित अधिकारसम्पन्न एक छानविन समितिका प्रमुख डा. भीम पुनलाई गत १९ नोभेम्बरमा एक पत्र लेखी उक्त पत्रको आधिकारिताबारे छानविन गरिदिन अनुरोध गरेका थिए ।

गाहामगरको अनुरोधपछि छानविन समितिका प्रमुख डा. पुनले गत २७ नोभेम्बरमा एनआरएनए कार्यकारी अध्यक्ष रविना थापालाई पत्र लेखेका छन् ।

‘कुन धरातलमा टेकेर वर्खास्त गरिएको पत्र लेखियो ? एउटा स्वायत्त शाखाको निर्वाचित अध्यक्षमाथि कारवाही गर्ने अधिकार केन्द्रका दुई पदाधिकारीलाई कुन धारा र दफाले दियो ? समाजमा भ्रम फैलाइ वर्खास्त गरियो भन्ने दुई महासचिवलाई किन कारवाही नगर्ने ? आदि सवालसहित अध्यक्ष गाहामगरले पत्र लेखेका छन् ।

कुल आचार्य, रामशरण सिम्खडा र डा. हेमराज शर्माको नेतृत्वमा एनआरएनए यूके विवाद मिलाउन १४ सदस्यीय समिति बनाइए पनि उक्त समितिका सदस्यहरुले वस्तुस्थिति नबुझी एक निर्दोष भूतपूर्व ब्रिटिश गोर्खा सिपाही गाहामगरलाई अपहेलना र जातीय भेदभाव गरेको गाहा मगर समुहको आरोप छ ।

गैरगोर्खाहरुको समितिले नियतवश गोर्खा अभियन्तामाथि जातीय भेदभाव गरेको भन्दै गाहामगरले यसलाई पनि कानून लड्ने बलियो आधार भएको ठहर गरेको र आफुले केन्द्रबाट रेस्पोन्स नपाएको जनाउंदै अब केन्द्रका महासचिव गौरी जोशी र डा. केशव पौडेलसहित यसमा संलग्न सबैलाई सार्वजनिक रुपमै बाहिर ल्याउने गाहा मगरले चेतावनी दिएका छन् ।

उनले बेलायत र नेपालको अदालतमा बेग्लाबेग्लै मुद्दा दर्ता गरि उनीहरुलाई चरित्र हत्याको आरोपमा सजाय दिलाउन समेत पछि नपर्ने चेतावनी पनि दिएका छन् ।

गाहामगरले पत्रको जवाफ पठाउन वेवास्ता गरिए आउंदो फेब्रअरीमा एनआरएनए केन्द्रिय कार्यालयमा एनआरएनए यूकेका पञ्जीकृत सदस्यहरुसहित धर्ना दिने पनि बताएका छन् । विधान विपरितको क्रियाकलापमा संलग्न आइसीसीलाई समेत मुद्दा हाल्न वकिल तयारी अवस्थामा रहेको उनले बताएको गैरआवासीय नेपाली संघ युकेका प्रबक्ता भरतमणि चोङ्बाङले बताएका छन् ।

गाहा मगर एघार हजार ३६३ पञ्जीकृत सदस्यहरुको मतले निर्वाचित भएका थिए भने बेलायतको समेत निर्वाचन गराउने विश्वसनीय कम्पनी च्वाइस भोटिंग र केन्टोले यसको रिजल्ट दिएको थियो ।