Sansar News
काठमाडौं । कम्बोडिया र थाइल्यान्ड सीमा नजिकै रहेको पोइपेट सहरको ग्राण्ड डायमन्ड सिटी होटेल र क्यासिनोमा आगलागीमा परेर मृत्यु भएका झापाका निराकार पाण्डे १ महिना अघिमात्र कम्बोडिया पुगेका थिए ।
केही महिना अघि कम्बोडिया पुगेर दशैं र तिहार मनाउन नेपाल फर्किएका झापा बिर्तामोड नगरपालिका १ का पाण्डे पुन : भिजिट भिसामा एक महिना अघिमात्र कम्बोडिया पुगेका थिए ।
बिहीबार रातिदेखि उनी बसेको होटलमा आगलागी हुँदा उनले एनआरएनए कम्बोडियाका अध्यक्ष लालसिंह खड्कासँग आगलागी बारे जानकारी दिँदै उनलाई भ्वाइस म्यासेज समेत पठाएका थिए ।
‘तल ग्राउन्डबाट आगो लाग्यो । उहाँ १२ तलामा हुनुहुन्थ्यो । सुतिरहेको उहाँ उठेर आत्तिदै आगो लागेको बताएर सहयोग माग्नु भयो । हामीले उद्धारको प्रयास गर्छौ भनेका थियौं । तर, उहाँ १२ तलमाथिबाट हामफाल्नु भएछ ।’ खड्काले संसारन्युजसँग भने ।
अध्यक्ष खड्काले उक्त होटलमा अन्य २–३ जना नेपालीपनि कार्यरत रहेको तर उनीहरुको अवस्थाबारे आफुहरुले पत्ता लगाउने प्रयास गरिरहेको पनि बताए ।
‘अहिलेसम्म २६ जनाको शब निकालिएको छ । अन्य २–३ जना नेपाली पनि कार्यरत हुनुहुन्छ भन्ने सुनेको थिए । तर, उहाँहरुको अवस्था कस्तो छ भनेर पत्ता लगाउने प्रयास गरिरहेका छौं ।’ खड्काले भने ।
मृतक पाण्डेका परिवारले उनको शब पठाउनका लागि नेपालस्थित परारष्ट्र मन्त्रालयमार्फत् पहल गरेपछि आफुहरु तत्कालै शब पठाउने बताएका छन् ।
‘उहाँको परिवारले परराष्ट्र मन्त्रालयमा निवदेन दिनासाथ हामी यहाँ प्रोसेस गर्छौ । हामी शब पठाउन तयारी अवस्थामा छौं ।’ उनले आफुहरुले उनको शब बुझिसकेको जानकारी दिएका छन् ।
पाण्डेले होटलमा आगलागी भइरहँदा अध्यक्ष खड्कालाई हृदयविदारक भ्वाइस म्यासेज पठाएका थिए । उनले ‘दाइ ग्राण्ड डायमन्ड सिटी होटेलमा भिषण आगलागी भएको छ । बाँचे भने तपाईलाई फोन गर्छु । मरे भने मेरो शव नेपाल पठाइदिनुहोला ।’ पाण्डेले आफ्नो घर झापा १ मा रहेको र उनी अग्निप्रसाद पाण्डेको छोरा रहेको समेत भ्वाइस म्यासेजमा पठाएको खड्काले जानकारी दिएका छन् ।
अध्यक्ष खड्काका अनुसार मृत्यु हुनेमा निराकार पाण्डेसहित चाइना, मलेसिया लगायत देशका कामदारहरु रहेका छन् । उनले अहिलेसम्म २६ जनाको शव निकालिएको बताए ।
कम्बोडियामा झण्डै साढे दुईसय नेपालीहरु कार्यरत रहेको र संघमा ६५ भन्दा बढी आवद्ध रहेको पनि अध्यक्ष खड्काले जानकारी दिए ।
वि.सं.२०७९ पुस १५ शुक्रवार १५:२४ मा प्रकाशित
