Sansar News
काठमाडौं । तत्कालीन पाँचदलीय गठबन्धनमा कांग्रेसका उम्मेदवारविरुद्ध बागी उठेर जितेका प्रदेशसभा सदस्य दीपेन्द्र पुन ‘सिजल’ माओवादी पार्टीमै फर्किएका छन् । रोल्पा १ (ख)बाट चुनाव जितेका स्वतन्त्र सांसद पुनलाई माओवादी अध्यक्ष पुष्पकमल दाहाल प्रचण्डले बुधवार पार्टीमा स्वागत गरेका हुन् ।
चुनावी तालमेल गर्दा कांग्रेसलाई समर्थन गर्ने निर्णयविरुद्ध पुनले स्वतन्त्र उम्मेदवारी दिएका थिए । माओवादी उपमहासचिव वर्षमान पुन दीपेन्द्रलाई लिएर प्रधानमन्त्री निवास बालुवाटार पुगेका थिए ।
गठबन्धनको उम्मेदवारविरुद्ध बागी बनेपछि उनलाई पार्टीले निष्कासन गरेको थियो । पार्टीको पोलिटब्युरो सदस्य र रोल्पा जिल्ला इन्चार्जको जिम्मेवारीबाट राजीनामा दिएर उनी स्वतन्त्र उम्मेदवार बनेका थिए ।
सिजलको प्रवेशसँगै लुम्बिनी प्रदेशसभामा माओवादीको सांसद संख्या १० पुगेको छ ।
वि.सं.२०७९ पुस २० बुधवार ११:५० मा प्रकाशित
