Sansar News
काठमाडौं । गण्डकी प्रदेशको मुख्यमन्त्रीमा नेकपा एमालेका प्रदेश संसदीय दलका नेता खगराज अधिकारीले आफ्नो दाबी पेश गर्ने भएका छन् ।
सत्ता साझेदार दलको आइतबार बसेको बैठकको निर्णय अनुसार गण्डकी प्रदेश एमालेको भागमा परेपछि अधिकारीको मुख्यमन्त्री बन्ने यात्रा तय भएको हो । अधिकारीले आज प्रदेश प्रमुख समक्ष मुख्यमन्त्रीमा आफ्नो दाबी पेश गर्न लागेका हुन् ।
अधिकारीलाई आफ्नो पार्टीका २२, माओवादी केन्द्रका ८ र राष्ट्रिय प्रजातन्त्र पार्टीका २ गरी ३२ प्रदेश सांसदको समर्थन रहेको छ । मुख्यमन्त्रीका लागि ३१ सांसदको आवस्यकता पर्दछ ।
मुख्यमन्त्रीमा दाबी पेश गर्न प्रदेश प्रमुखको आव्हानसँगै अधिकारी आइतबारै ३२ सांसदको हस्ताक्षरसहित मुख्यमन्त्रीका लागि तम्तयार भएर बसेका थिए ।
आइतबार बेलुका बसेको सत्ता साझदार दलहरुको बैठकले सातै प्रदेशका मुख्यमन्त्रीको भागबण्डा टुंगो लगाएका हुन् । उक्त बैठकको निर्णय अनुसार एमालेले ३ प्रदेशका मुख्यमन्त्री पदमा पाँचैवर्ष एकल नेतृत्व गर्नेछ भने नेकपा माओवादी केन्द्रले कर्णाली प्रदेशमा पाँचैवर्ष एकल नेतृत्व गर्नेछ । बाँकी प्रदेशमा आलोपालो सरकार चलाउने निर्णय भएको छ ।
वि.सं.२०७९ पुस २५ सोमवार ०८:२९ मा प्रकाशित
