हामी सबैकाे संसारन्यूज

काठमाडौं । नेकपा एकिकृत समाजवादी पार्टीका अध्यक्ष माधव कुमार नेपालले प्रधानमन्त्री पुष्पकमल दाहाल ‘प्रचण्ड’ ले जनताका लागि केही गरेर देखाउने तथा नयाँ ढंगले अगाडि बढ्ने भन्ने कुरा बोलीमा मात्र नभएर व्यवहारमा व्यवहारमा पनि देखिनुपर्ने बताएका छन् ।

सोमबार प्रतिनिधि सभाको पहिलो बैठकमा आफ्नो सम्बोधनका क्रममा अध्यक्ष नेपालले सो कुरा बताएका हुन् ।

‘प्रधानमन्त्रीले भनेजस्तै केही गरेर देखाउने, नयाँ ढंगले अगाडि बढ्ने, नमुना काम गर्ने र सबैक्षेत्रमा सुधार तथा आमुल परिवर्तन गरी देखिने गरी काम गरेर देखाउने जुन प्रतिबद्धता व्यक्त गर्नुभएको छ त्यो सबैले महसुस गर्ने गरी तथा परिवर्तनको अनुभुति जनताले पाउन सक्ने गरी काम अगाडि बढोस् । बोली र ब्यबहारमा सामञ्जस्यता आवोस् ।’ अध्यक्ष नेपालले भने ।

अध्यक्ष नेपाले सम्बोधनका क्रममा प्रधानमन्त्री प्रचण्डलाई बधाई दिँदै सफल कार्यकालको कामना समेत गरे । उनले देशमा राजनीतिक स्थायीत्वका लागि सबैले आसा अपेक्षा गरेको भन्दै छिन छिनमा सरकार परिवर्तन होस् भन्ने आफुहरुले नचाहेको समेत बताए ।

‘हामी चाहादैनौं छिन–छिनमा सरकार परिवर्तन होस्, विगतका अनुभवहरुले हामीलाई केही शिक्षा दिएको छ । त्यसैले विगतका अनुभवबाट शिक्षा ग्रहण गरेर अगाडि बढ्नुपर्छ । संविधानलाई मिच्ने कुरामा होइन, त्यसको पालना गर्ने कुरामा प्रधानमन्त्रीेले पनि संविधानको पालना गरेर हिँड्नुपर्छ भन्ने कुरालाई बर्तमान प्रधानमन्त्रीले मनन गर्नुहुनेछ भन्ने आसा लिएको छु ।’ अध्यक्ष नेपालले भने ।

अध्यक्ष नेपालले जनताले यो सरकार र संसदबाट धेरै आसा गरेको बताउँदै पाँचवर्षे कार्यकालमा संसदले महत्वपूर्ण भूमिका खेल्नुपर्ने समेत बताए ।