हामी सबैकाे संसारन्यूज

काठमाडौं । सरकारले पोखरामा भएको विमान दुर्घटनाको छानविन गर्न पाँच सदस्यीय आयोग गठन गरेको छ ।

विमान दुर्घटना लगत्तै बसेको मन्त्रिपरिषद्को आकस्मिक बैठकले पूर्वसचिव नागेन्द्र घिमिरेको संयोजकत्वमा दुर्घटना जाँच आयोग गठनसमेत गरेको छ । आयोगलाई ४५ दिनभित्र प्रतिवेदन पेश गर्न समयसीमा तोकिएको छ।

त्यस्तै सोहि बैठकले घटनाबारे मृतकका आफन्तहरूलाई सही सूचना दिन विमानस्थलमा कल सेन्टर स्थापना गर्ने निर्णय गर्दै पार्थीव शरीर बुझ्न र लैजान सरकारको तर्फबाट सहयोग र सहजीकरण गर्ने निर्णय पनि गरेको छ।

त्यस्तै सबै हवाइजहाजहरूको प्राविधिक परीक्षण अनिवार्य गर्नसमेत बैठकले निर्देशन दिएको छ । त्यसको अनुगमनको जिम्मेवारी नागरिक उड्डयन प्राधिकरणलाई तोकेकोसमेत बैठकले जनाएको छ ।

बैठकले घाइतेहरूको शीघ्र स्वास्थ्यलाभको कामना गर्दै उद्दार कार्यलाई प्रभावकारी बनाउन सरकारका सबै संयन्त्रहरूलाई निर्देशन दिँदै माघ २ गते सोमबारलाई राष्ट्रिय शोकका रूपमा सार्वजनिक विदा दिने निर्णय पनि गरेको छ।

आइतबार बिहान पोखराको सेती खोचमा दुर्घटना भएको ९एन–एएनसी जहाजमा ५३ नेपाली, ५ भारतीय, ४ रसियन, २ कोरियन र अर्जेन्टियन, अष्ट्रेलियन, आइरिस र फ्रान्सेली १/१ जना गरी ७२ जना सवार थिए । ७२ जनामा ३७ पुरुष, २५ महिला, ३ बालबालिका र ३ शिशु रहेक थिए ।