हामी सबैकाे संसारन्यूज

काठमाडौं । जनमत पार्टीका अध्यक्ष डा. सीके राउतले मधेशी र थारु बिहीन राष्ट्रिय सहमतिको कुरामा अर्थ नरहेको बताएका छन् ।

सभामुख चयनका लागि बसेको प्रतिनिधि सभा बैठकमा डा. राउतले दलहरुले राष्ट्रिय सहमतिका लागि दलभन्दा माथि उठ्ने कुरा ल्याए पनि त्यो सहमति अहिलेसम्म पदका लागि मात्रै भएको बताए ।

‘तपाईहरु कस्तो खालको राष्ट्रिय सहमति खोज्नु भएको हो ? पूरै मधेशी र थारु समुदाय, जसपा/लोसपा/जनमत/नागरिक उन्मुत्ति पार्टीलाई एकछेउमा राखेर भित्तामा धकेलेर मधेशी र थारु बिहिन राष्ट्रिय सहमतिको कुरा गर्नु भएको हो ? यो तपाईका दलहरुले स्पष्ट पारिदिनुस् ।’ डा. राउतले भने ।

उनले दलभन्दा माथि उठेर मतदान गर्न आग्रह गर्ने, हामी दलभन्दा माथि उठ्छौं पनि भन्ने तर एउटा निश्चित समुदाय र वर्गभन्दा, निश्चित जातिको मुखौटा भन्दा माथि उठ्न नसकेको आरोप लगाउँदै त्यसबाट माथि उठ्ने कि नउठ्ने भन्ने विषयमा प्रष्ट पारिदिन दलहरुलाई आग्रह गरेका थिए ।

‘कि हुन्न तपाईको पार्टीले स्पष्ट पार्नुपर्यो । अहिलेसम्म पनि जुन प्रकारको नश्लवादी चिन्तन सरकार र संसदले देखाइरहेको छ त्यो तपाईहरुको पार्टीले देखाइरहेको छ ।’ उनले भने ।

उनले माघ ५ गते मधेशमा बलिदानी दिवस राष्ट्रव्यापी रुपमा मनाउनुपर्ने बताउँदै मधेश आन्दोलनका सहिदहरुलाई संसदले सम्मान दिने कि नदिने भन्ने प्रश्न समेत गरे ।

डा. राउतले संसदमै सहिदहरुको सम्झनामा एकमिनेट मौन धारण गरेका थिए । त्यसमा अन्य सांसदहरु पनि मौनधारणका लागि उठेका थिए ।
अन्तिममा उनले सत्तागठबन्धनबाट सभामुखको उम्मेदवार रहेका देवराज घिमीरेलाई आफ्नो दलको समर्थन रहेको जानकारी दिएका थिए ।