काठमाडौं । एमालेका अध्यक्ष केपी शर्मा ओली र एकीकृत समाजवादीका अध्यक्ष माधवकुमार नेपाल फेरि सँगै देखिएका छन् । शुक्रबार सभामुखको सपथ ग्रहणका कार्यक्रममा दुई नेता सँगै देखिएका हुन् ।
पूर्व प्रधानमन्त्रीको लहरमा केपी ओली, माधव नेपाल र डा. बाबुराम भट्टराई एउटै लहरमा बसको थिए। साथै, पूर्व प्रधानमन्त्री एवम् समाजवादीका सम्मानित नेता झलनाथ खनाल पनि एउटै लहरमा थिए । एउटै लहरमा बसेका ओली र नेपालबीच संवादसमेत भएको देखिएको थियो ।
यसअघि ११ पुसमा प्रधानमन्त्री पुष्पकमल दाहाल प्रचण्डले राष्ट्रपति कार्यालय शीतलनिवासमा शपथ गर्दा सँगै देखिएपछि फेरि सभामुखको शपथमा ओली र नेपाल सँगै देखिएका हुन् । दुई नेता एउटै लहरमा परेपछि ओलीले “फेरि सँगै परिएछ” भनेर हाँसीमजाकसमेत गरेको एक नेताले बताए ।
ओलीको हाँसीमजाक पछि दुई नेताबीच कुराकानी पनि भएको थियो ।
अहिले एकीकृत समाजवादी सत्ता गठबन्धनमा छैन । प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले एकीकृत समाजवादीलाई सरकारमा ल्याउन निकै प्रयास गरेका थिए । तर, एमाले अध्यक्ष ओलीको असहमतिका कारण त्यो सम्भव भएको छैन । तर, राष्ट्रपतिको चुनावलाई ध्यानमा राखी एमाले भने एकीकृत समाजवादीसँग संवादमा जोडिएको बताइएको छ ।
वि.सं.२०७९ माघ ६ शुक्रवार १७:५० मा प्रकाशित