Sansar News
काठमाडौं । प्रधानमन्त्री पुष्पकमल दाहाल ‘प्रचण्ड’ले राष्ट्रिय स्वतन्त्र पार्टी (रास्वपा) लाई लिएर पछिल्लो समय देखिएको सत्ता गठबन्धनभित्रको समस्या छिट्टै समाधान हुने बताएका छन् ।
पेरिसडाँडामा शनिबार बसेको पार्टीको स्थायी समितिको बैठकमा सम्बोधन गर्ने क्रममा प्रधानमन्त्री प्रचण्डले गृहमन्त्रालयको विषयमा उठेको समस्याका बारेमा रास्वपासँग छलफल भइरहेको र समस्या छिट्टै समाधान हुने बताएका हुन् ।
बैठकपछि संचारकर्मीसँग कुरा गर्दै प्रधानमन्त्री प्रचण्डले भने–‘अहिले मेरो कुरा हुँदैछ । समस्या समाधान हुन्छ ।’
रास्वपाका सभापति रवि लामिछाने नागरिकता विवादमा तानिएपछि उनले सम्हाल्दै आएको गृहमन्त्रालयबाट बाहिरीनु परेको थियो । तत्कालै पुनः नेपाली नागरिकता लिएका लामिछानेले गृहमन्त्रालय पुनः आफुलाई दिन माग गर्दै आएका छन् ।
उता प्रधानमन्त्री प्रचण्डले नागरिकताको विषयमा सर्वोच्चको फैसलाको पूर्णपाठ नआउँदासम्म रास्वपालाई गृहमन्त्रालय दिन नमिल्ने बताउँदै आएका छन् । त्यसमा रास्वपाले आजसम्मको अल्मिेटम दिँदै गृहमन्त्रालय आफुहरुले नपाए कुनै पनि बेला पार्टी पदाधिकारीको बैठक बसेर सरकारबाट बाहिरीने चेतावनी दिँदै आएको छ ।
वि.सं.२०७९ माघ २१ शनिवार १८:१८ मा प्रकाशित
