हामी सबैकाे संसारन्यूज

बाबुराम गौतम, गुल्मी

१.
महङ्गीले छोयो आकाश
गरिबले सजाएका सपना
भएजति भए खलास l

२.
चिसिए कैयौँका चुला
चुनावको बेला सबैले
पार्छन् आँखामा फुला l

३.
बुझ्दैनन् कसैले व्यथा
राहतको न्यानो घाम
भयो एकादेशको कथा l

४.
कामको मेसो भेटिएन
अहिले पनि गरिबको
मनको प्यास मेटिएन l

५.
समृद्धि छाओस् देशमा
जनता छन् आसामुखी
बदलिदो यो परिवेशमा l

६
निर्धनता अभिशाप हैन
सम्बोधन नगरेसम्म राज्यले
यिनको अवस्था सुध्रिदैन l

७.
अवसर रहेछ ठूलो
गरिबको अगाडि जहिले
ठडिन्छ विभेदको तुलो l

८.
सम्बन्धलाई समय दिऊँ
जीवनलाई खुसी तुल्याउने
अपरिमेय आनन्द लिऊँ l

९.
सत्कार्यमा भएर सहभागी
हरेक समुदायबाट लड्नुपर्छ
आफ्नो स्वाभिमानको लागि l

१०.
नयाँ बिहानी आउँदैछ
घाम छरिएर कुनाकुन्टा
प्यारो धरा जगमगाउँदैछ l