Sansar News
काठमाडौं । उच्चस्तरीय राजनीतिक संयन्त्रको बैठक भोली शुक्रबार बस्ने भएको छ ।
आज दिउँसो ३ बजे बस्ने भनिएको उक्त बैठक रोकेर प्रधानमन्त्री पुष्पकमल दाहाल ‘प्रचण्ड’ र संयन्त्रका संयोजक केपी शर्मा ओलीबीच सिंहदरबारमा भेटवार्ता भएको छ ।
सुदूरपश्चिम प्रदेशका मुख्यमन्त्री राजेन्द्र सिंह रावलले आज प्रदेशसभाको बैठकबाट विश्वासको मत लिने तय भएपनि गठबन्धनभित्र रहेको नागरिक उन्मुक्ति पार्टीले मत नदिने भएपछि रावलको मुख्ममन्त्री पद समस्यामा परेको छ ।
सो पार्टीका अडानका कारण विश्वासको मत पाउने सम्भावना नदेखिएपछि संयन्त्रको बैठक रोकेर प्रधानमन्त्री र ओली छलफलमा जुटेका हुन् । छलफलमा नागरिक उन्मुक्ति पार्टीको माग सम्बोधन गर्ने खालको नभएको निष्कर्षसहित संयन्त्रको बैठक स्थगित गरिएको स्रोतले जनाएको छ ।
स्रोतका अनुसार नागरिक उन्मुक्तिसँग छलफल भएपनि नेता चौधरीको रिहाइका लागि उनीहरुले लिखित प्रतिबद्वता गर्न माग गरेपछि सम्बोधन गर्न नसकिएको बताइएको छ ।
गठबन्धनमा रहेका दलहरुको समर्थनमा पुष २७ गते मुख्यमन्त्रीमा नियुक्त भएका रावललाई विश्वासको मतमा भने नागरिक उन्मुक्ति पार्टीले साथ नदिँदा सुदूरपश्चिम सरकार ढल्ने निश्चित देखिएको छ ।
वि.सं.२०७९ माघ २६ बिहीवार १७:३० मा प्रकाशित
