Sansar News
काठमाडौं । सुदूरपश्चिमका मुख्यमन्त्री राजेन्द्र सिंह रावल पदमुक्त भएका छन् ।
बिहीबार प्रदेशसभामा राखेको विश्वासको प्रस्तावलाई सभामा उपस्थित बहुमत सांंसदले अस्वीकृत गरेपछि मुख्यमन्त्री रावल पदमुक्त भएका हुन् ।रावलको प्रस्ताव बहुमत सदस्यबाट अस्वीकृत भएको सभामुख भीमबहादुर भण्डारीले घोषणा गरेका हुन् ।
पुष २७ गते मुख्यमन्त्रीमा समर्थन गरेको गठबन्धनभित्रकै नागरिक उन्मुक्ति पार्टीले विश्वासको मत लिने क्रममा साथ नदिएपछि रावलको मुख्यमन्त्री पद गुमेको हो ।
५३ जना सदस्य रहेको सुदूरपश्चिम प्रदेशमा एमाले, माओवादी केन्द्र, राष्ट्रिय प्रजातन्त्र पार्टी र नागरिक उन्मुक्ति पार्टी गरी २७ सांसदको समर्थनमा मुख्यमन्त्री बनेका रावललाई नाउपाले साथ नदिएपछि रावल नेतृत्वको सरकार ढलेको हो ।
सो पार्टीले आफ्ना नेता रेशम चौधरी लगायतलाई रिहा गर्ने लिखित प्रतिबद्धता जाहेर नगर्दासम्म मुख्मन्त्रीलाई विश्वासको मत नदिने अडान राखेको थियो ।
सुदूरपश्चिमका मुख्यमन्त्री विश्वासको मत कुर्दै, नागरिक उन्मुक्तिका सांसद काठमाडौंमा
वि.सं.२०७९ माघ २६ बिहीवार १७:४३ मा प्रकाशित
