Sansar News
काठमाडौं । भारतीय विदेश सचिव विनयमोहन क्वात्रा नेपाल आउने भएका छन् । उनी आगामी सोमबार काठमाडौं आउने भएका हुन् ।
दुबै देशका परराष्ट्र मन्त्रालयले शुक्रबार विज्ञप्ति जारी गर्दै क्वात्राको भ्रमणबारे जानकारी दिएका हुन् । परराष्ट्र मन्त्रालयले परराष्ट्र सचिव भरतराज पौड्यालको निमन्त्रणामा क्वात्रा नेपाल आउन लागेको जानकारी दिएको छ।
भ्रमणका क्रममा क्वात्राले समकक्षी पौड्यालसँग औपचारिक छलफल गर्ने छन्। उक्त छलफलमा दुई पक्षीय सहकार्यका विभिन्न पक्ष जस्तै कनेक्टिभिटी, उर्जा व्यापार, कृषि, स्वास्थ्यबारे छलफल हुनेछ।
यसअघि गत भदौमा परराष्ट्र सचिव पौड्यालले भारत भ्रमण गरेका थिए।
प्रधानमन्त्री दाहालले प्रधानमन्त्रीमा नियुक्त भएपछि दिएको पहिलो अन्तर्वार्ताका क्रममा पहिलो विदेश भ्रमण भारत हुनसक्ने बताएका थिए । नेपालमा राष्ट्रपतिको निर्वाचन आगामी फागुन २५ गते हुँदैछ । त्यो भन्दा अघि नै प्रधानमन्त्री प्रचण्डको भारत भ्रमणको तयारी भैरहेको बताइएकाे छ । क्वात्राकाे नेपाल भ्रमण प्रधानमन्त्री प्रचण्डलाई भारत भ्रमणका लागि निम्ता गर्न आउन लागेकाे बताइएकाे छ ।
वि.सं.२०७९ माघ २७ शुक्रवार १५:२४ मा प्रकाशित
