Sansar News
काठमाडौं । नेपाली जनसम्पर्क समिति बहराईनले सिरियाका भूकम्प पीडितहरुको लागि कम्बल सहयोग पठाएको छ ।
समितिले सिरियन राजदुतावास बहराईन मार्फत् ११५ (एक सय पन्ध्र) थान ओड्ने न्यानो कम्बल सहयोग हस्तान्तरण गरेको हो ।
गत ६ फेब्रवरी २०२३ सोमवारका दिन गएको विनासकारी भूकम्पबाट सिरिया र टर्कीमा अत्यन्त ठुलो धनजनको क्षति हुन गई दुवै देशका सरकारले अन्तराष्ट्रिय रुपमा न्यानो कपडा लगायतका खाद्य सामाग्री सहयोगको आह्वान गरेका थिए ।
सोहि आव्हानलाई मध्येनजर गर्दै नेपाली जनसम्पर्क समिति बहराईनले आफ्नो कार्यसमितिका पदाधिकारी कार्यसमिति सदस्य एवं सल्लाहकारहरुवीच स्वेच्छिक सहयोग रकम संकलन गरि ११५ थान ब्लांकेट पठाएको हो ।
नेपाली दुतावास बहराईनका प्रतिनिधि सकिल अहमदको रोहवरमा समितिका सभापति पदम सुन्दर गुरुङले सो ब्लाङ्गकेट हस्तान्तरण गरेका हुन् ।
उक्त सहयोग सामाग्री हस्तान्तरण कार्यक्रममा नेका महासमिति सदस्य शेर बहादुर रावत, १४ औं महाधिवेशन प्रतिनिधि सुर्य थापा, महामन्त्री उमेश जोशी, सहमहामन्त्री राजु नेपाली, सल्लाहकार तिर्थ भण्डारी सदस्य जीवलाल गौतम लगायत प्रवासी नेपाली मञ्च मध्यपूर्व अध्यक्ष शालिग्राम पन्त र नेपाली जनप्रगतिशिल मञ्च बहराईनका बरिष्ठ उपाध्यक्ष रामु काफ्लेको समेत उपस्थिति रहेको थियो ।
नेपाली दुतावास बहराईनको समन्वयकारी भुमिकाप्रति हार्दिक कृतज्ञता प्रकट गर्दै समितिले संचालन गरेको यस पुनित कार्यमा सहभागिता जनाउनु हुने सम्पूर्ण पदाधिकारीहरु, कार्यसमिति सदस्यहरु लगायत समितिका सल्लाहकार हरुप्रति समितिले धन्यवाद ज्ञापन गरेको छ ।
वि.सं.२०७९ फागुन ५ शुक्रवार १८:४७ मा प्रकाशित
