हामी सबैकाे संसारन्यूज

काठमाडौं । नेपाली कांग्रेसका महामन्त्री विश्वप्रकाश शर्माले आफ्नो पार्टीसहित आठ दलले राष्ट्रपतिमा कांग्रेसको उम्मेदवारलाई समर्थन गर्ने भएपछि ओली नेतृत्वको सातदलीय गठबन्धन भत्किएको संकेत गरेका छन् ।

बालुवाटारमा बसेको कांग्रेससहित आठदलको बैठकले राष्ट्रपतिमा कांग्रेसका उम्मेदवारलाई समर्थन गर्ने निर्णय गरेपछि महामन्त्री शर्माले अन्तत गठबन्धन भत्किने भयो भन्ने संकेत गरेका छन् ।

आठ दलको बैठक पछि प्रतिनिधि सभा सांसद समेत रहेका शर्माले भनेका छन् ‘पिंजडा’ अन्ततः भत्किने भयो ! राष्ट्रपति पदमा नेपाली काँग्रेसको उम्मेदवारलाई विजयी गराउने बहुमत दलहरूको सर्वसम्मत निर्णय !’

गत मंसिरमा सम्पन्न प्रतिनिधि सभा र प्रदेश सभा निर्वाचनपछि नयाँ सरकार गठनका क्रममा नेपाली कांग्रेसका सभापति देउवाले प्रधानमन्त्री नछाड्ने अडान लिएपछि अन्तिम समयमा नेकपा माओवादी केन्द्रका अध्यक्ष प्रचण्डले उक्त गठबन्धन तोडेका थिए । तत्कालै नेकपा एमालेसँग नयाँ राजनीतिक समिकरण बनाउँदै सातदलको समर्थनमा पुष १० गते प्रधानमन्त्री बनेका प्रचण्डले माघ २६ गते प्रधानमन्त्रीमा विश्वासको मत लिएको एकमहिना नहुँदै उक्त गठबन्धन छोडेर तीन नयाँ दलसहित आठदलीय गठबन्धन बनाएका छन् । उक्त गठबन्धनको पहिलो बैठकले राष्ट्रपतिमा कांग्रेसलाई समर्थन गर्ने निर्णय गरेको हो ।

यसअघि पुष १० गते सातदलीय गठबन्धनकोे सहमति अनुसार एमालेले राष्ट्रपति पदमा आफ्नो दावी गर्दै आएको थियो । तर, माघ २६ गते कांग्रेससहित दुईतिहाइ बहुमतको विश्वासको मत पाएर प्रधानमन्त्री बनेका  प्रचण्डले राष्ट्रिय सहमतिमा राष्ट्रपति बनाउनु पर्ने अडान राख्दै आएका थिए ।

उता कांग्रेसले पनि आफ्नो पार्टीका उम्मेदवार तथा आफुले समर्थन गरेको व्यक्ति नै राष्ट्रपति बन्ने अडान राख्दै आएको थियो । अन्ततः कांग्रेसको उक्त अडान सफल भएको छ । राष्ट्रपतिमा कांग्रेसका उम्मेदवारलाई आफ्नो दलसहित अन्य सातदलको समर्थन मिलेको छ ।