हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल ‘प्रचण्ड’ ले आजदेखि नयाँ यात्रा सुरु भएको बताएका छन् ।

आज बालुवाटारमा बसेको आठ दलको बैठकमा प्रधानमन्त्री प्रचण्डले राष्ट्रपतिमा कांग्रेसलाई समर्थन गर्न प्रस्ताव गर्दै यस्तो कुरा बताएको एकिकृत समाजवादीका नेता प्रकाश ज्वालाले बताएका छन् ।

‘प्रधानमन्त्रीले एउटा प्रस्ताव ल्याउनु् भयो । संसदको सबैभन्दा ठूलो दल नेपाली कांग्रेसलाई राष्ट्रपतिको चुनावमा हामी सबैले समर्थन गरौं भन्ने प्रस्ताव ल्याउनु भयो,’ बैठकपछि संचारकर्मीसँग ज्वालाले भने, ‘त्यो प्रस्तावमा आठवटै दलले नेपाली कांग्रेसको उम्मेदवारलाई यसपटकको राष्ट्रपतिमा समर्थन र सहयोग गर्ने टुंगो लागेको छ ।’

नेपाली कांग्रेसले कसलाई राष्ट्रपतिको उम्मेदवार बनाउने भन्ने विषयमा आफै निर्णय गर्ला, तर दलहरुले कांग्रेसलाई समर्थन गर्ने निर्णय भएको पनि ज्वालाले जानकारी दिए ।

‘प्रधानमन्त्रीले पनि आजदेखि हाम्रो नयाँ राजनीतिक यात्रा सुरु भएको छ । यसलाई अगाडि बढाऔं । सबै दलहरु मिलेर जाऔं र राष्ट्रको समृद्दि, राजनीतिक स्थिरता, राष्ट्रिय स्वाधीनता र जनतालाई सेवा सुविधा दिने क्रममा हामी सबै मिलेर एकताबद्ध भएर जाने हो । साथै सत्ता समिकरणमा पनि एकतावद्ध भएर जाऔं भनेर अपिल गर्नुभएको छ । ’ नेता ज्वालाले भने ।

ज्वालाले आजको बैठकमा राष्ट्रपतिको विषयमा मात्र टुंगो लागेको र उपराष्ट्रपतिको निर्वाचनको मिति पनि नतोकिएकाले ती विषयमा पछि छलफल हुने बताए ।

बैठकमा राष्ट्रिय प्रजातन्त्र पार्टी, राष्ट्रिय स्वतन्त्र पार्टी र एमाले भने सहभागी थिएनन् ।

राप्रपाको आज बसेको केन्द्रीय कार्य सम्पादन समितिको बैठकले राष्ट्रपतिमा कसैलाई समर्थन नगर्ने र मत पनि नदिने निर्णय गरेको थियो ।

त्यस्तै नेकपा एमालेका अध्यक्ष केपी शर्मा ओलीले शनिबार आफ्नो दलले राष्ट्रपतिको उम्मेदवारी मनोनयन दर्ता गराउने बताएका थिए ।