हामी सबैकाे संसारन्यूज

काठमाडौं । फागुन २५ मा हुँदै गरेको राष्ट्रपति निर्वाचनमा नेपाली कांग्रेसको तर्फबाट रामचन्द्र पौडेल उम्मेदवार छन् भने एमालेको तर्फबाट सुवासचन्द्र नेम्वाङ्ग छन् । पौडेललाई कांग्रेस र माओवादीसहितको आठ दलको समर्थन छ भने नेम्वाङ्गको पक्षमा एमाले मात्रै छ ।

जसको कारण पनि मतभारका हिसाबले पौडेल निकै सहज अवस्थामा छन् भने नेम्वाङ्ग निकै सकस अवस्थामा छन् । यस्तोमा चुनावको सम्भावित परिणाम पौडेलकै पक्षमा आउने देखिन्छ ।

पौडेलको पक्षमा आठ दल (कांग्रेस, माओवादी केन्द्र, एकीकृत समाजवादी, जसपा, लोसपा, जनमत पार्टी, नागरिक उन्मुक्ति र राष्ट्रिय जनमोर्चा) खुलेका छन् । आठ दलको कुल मतभार ३१ हजार १९७ छ । राष्ट्रपतिमा निर्वाचित हुन न्यूनतम २६ हजार तीन सय १५ मत आवश्यक पर्दछ । हालसम्मको अवस्थालाई हेर्दा पौडेलको पक्षमा आवश्यक मतभारभन्दा पनि पाँच हजार बढी छ ।
यता, नेम्वाङ्गको पक्षमा एमालेबाहेक अन्य पार्टी खुलेका छैनन् । एमालेसँग १५ हजार १५४ मात्रै मतभार छ । तथापी, पछिल्लो समय एमालेसँग नजिक देखिएका राप्रपा र रास्वपा कसलाई सहयोग गर्ने भनेर खुलेका छैनन् । राप्रपासँग दुई हजार ४५० मतभार छ भने रास्वपासँग एक हजार ५८० मतभार छ ।

यसैगरी, नेपाल मजदुर किसान पार्टी, नेपाल संघीय समाजवादी पार्टी र हाम्रो पार्टी पनि कसलाई सहयोग गर्ने भनेर खुलेका छैनन् । सानो संख्यामा मतभार भएपनि निर्णायक अवस्थामा उनीहरुको भूमिका भने महत्वपूर्ण देखिन्छ । तथापी, आठ दल कायमै रहेको अवस्थामा बाँकी सबै दल नेम्वाङ्गको पक्षमा खुल्दा पनि बहुमत पुग्दैन ।

तथापी, सुनिश्चित छैन जीत

राष्ट्रपतिको उम्मेदवार तय गरेसँगै कांग्रेस र एमाले दुवै दल अन्य दलसँग राष्ट्रपति निर्वाचनको लागि सहयोग जुटाउन लागि परेका छन् । दुवै दलले पत्रचार र भेटघाट गरिरहेका छन् ।

एमालेले राष्ट्रपति आफ्नो पक्षमा पार्न माओवादी केन्द्रलगायतलाई नै विभिन्न प्रस्तावहरु राखिरहेको छ भने कांग्रेसले पनि एमालेसँग पनि मत मागेको छ । आठ दलीय गठबन्धन बनिसकेपछि पनि एमालेले तत्कालिन नेकपालाई ब्यूँताउने गरी पनि छलफल बढाइरहेको छ ।

यहाँ महत्वपूर्ण विषय, प्रधानमन्त्री चयनको अन्मित समयमा भएका गठबन्धन भंग हुने र नयाँ गठबन्धन बन्ने परिस्थिति देखिएको थियो । राष्ट्रपति चयनको प्रक्रिया सुरु हुँदै गर्दा सत्ता गठबन्धन भंग भएर कांग्रेस–माओवादीलगायतको आठ दलीय गठबन्धन बनेको छ । तथापी, यही गठबन्धन यही शैलीमा अगाडि बढ्नेमा निश्चित हुने अवस्था छैन । बीचमा हुने घटनाक्रमले पनि यसलाई तय गर्ने देखिन्छ ।

अर्कोतर्फ, मतदान गोप्यरुपमा हुने र प्रतिनिधिसभा, राष्ट्रिय सभा र प्रदेशसभासम्मका सांसदहरु सहभागि हुने हुँदा पार्टीको ह्वीप लाग्ने अवस्था रहन्न । जसले पनि कसको पक्षमा मत जान्छ यकिनपूर्वक भन्न सकिन्न ।