Sansar News
पोखरा । गण्डकी प्रदेश प्रमुख पृथ्वीमान गुरुङले प्रदेशसभाको चालु अधिवेशन अन्त्य गरेका छन् ।
प्रदेश सरकारको सिफारिसमा प्रदेश प्रमुख गुरुङले प्रदेशसभाको चालु अधिवेशन १८ फागुन बिहीबार मध्यराति १२ बजेदेखि अन्त्य गरेका प्रदेश प्रमुखको कार्यालयका प्रवक्ता चण्डीप्रसाद अर्यालले जानकारी दिए ।
अधिवेशन अन्त्य गरिएको विषयमा जानकारी दिन प्रवक्ता अर्यालले जारी गरेको विज्ञप्तिमा भनिएको छ, ‘प्रदेश सरकार गण्डकी प्रदेश, मन्त्रिपरिषद्को सिफारिसमा नेपालको संविधानको धारा १८३ को उपधारा (२) बमोजिम प्रदेश प्रमुख पृथ्वीमान गुरुङबाट प्रदेश सभाको चालु अधिवेशन ०७९ फागुन १८ गते बिहीबार राति १२ बजेटबाट अन्त्य भएको ब्यहोरा सम्बन्धित सबैको जानकारीको लागि अनुरोध छ ।’
केन्द्रमा फेरिएको राजनीतिक समीकरणसँगै प्रदेश सरकारसमेत ढल्ने अवस्था भइरहेका बेला चालु अधिवेशन अन्त्य गरिएको हो । पछिल्लो राजनीतिक घटनाक्रमले गर्दा मुख्यमन्त्री खगराज अधिकारीले विश्वासको मत लिनुपर्ने अवस्था छ । सरकारलाई समर्थन दिएको माओवादी केन्द्र र राप्रपामध्ये जसले विश्वासको मत फिर्ता लिए पनि मुख्यमन्त्रीले विश्वासको मत जुटाउनुपर्छ । त्यसो हुँदा विशेष अधिवेशन आह्वान हुनेछ ।
वि.सं.२०७९ फागुन १८ बिहीवार १८:०५ मा प्रकाशित
