हामी सबैकाे संसारन्यूज

काठमाडौं । कांग्रेस–माओवादी केन्द्रसहितको गठबन्धनमा सहभागि भएसँगै एकीकृत समाजवादीभित्र विवाद सुरु भएको छ । एमालेसँग सहकार्य गर्ने वा कांग्रेस–माओवादी केन्द्रसँग भन्नेमा विवाद रहिरहेका बेला अध्यक्ष माधव नेपालले एकलौटी निर्णय लिएसँगै एकीकृत समाजवादीमा विवाद भएको हो । एमालेसँग नजिक रहेको समूह पछिल्लो समय निकै असन्तुष्ट बनेको छ ।

राष्ट्रपतिमा कांग्रेसलाई सघाउँदै आठ दलीय गठबन्धन बनाउने निर्णयप्रति असहमत एसभित्रको समूह एमालेसँग छलफलमा जुटेको छ । ‘वामपन्थी एकता’को कुरा गरिरहेका एकीकृत समाजवादीका सम्मानित नेता झलनाथ खनाल नियमित एमाले नेतृत्वसँग छलफलमा जोडिएको बझिएको छ ।

बताइएअनुसार खनाल पार्टी एकतासम्मको तहबाट छलफलमा जुटेका छन् । खनालले एमालेसँग एकता गर्नुपर्ने विचार बोक्नेहरुको नेतृत्व एसभित्र गरिरहेका छन् ।

हालै एकीकृत समाजवादीका सम्मानित नेता खनाल र एमाले महासचिव शंकर पोखरेलबीच गोप्य भेटवार्तासमेत भएको बुझिएको छ । खनालको निजी निवास डल्लुमा दुईबीच भेटवार्ता भएको हो । भेटमा पार्टी एकता कसरी गर्ने ? भन्ने विषयमा छलफल भएको बताइएको छ ।

निर्वाचन परिणाम आएलगत्तै एकीकृत समाजवादीभित्र एमालेसँग एकता गर्नेगरी छलफल सुरु भएको थियो । सम्मानित नेता खनालले मुख नखोलेको भएपनि उनी निकट मानिएका अन्य नेताले एमालेसँग निःशर्त एकताको विषयमा पनि छलफल चलाएका थिए ।

पार्टी उपाध्यक्ष मुकुन्द न्यौपानेले एमालेसँग मिलेर जानुपर्ने पक्षमा नियमित लबिङ गरिरहेका छन्। उनको पक्षमा जीवनराम श्रेष्ठ, रामकुमारी झाँक्रीलगायतका नेताहरु पनि सक्रिय बनेका थिए ।