हामी सबैकाे संसारन्यूज

काठमाडौं । सत्ता साझेदार नौ दलीय गठबन्धनले संक्रमणकालिन न्याय बारेमा उठेका विषयमा गम्भीर ध्यानाकर्षण भएको जनाएका छन् ।

आइतबार बेलुका प्रधानमन्त्रीको सरकारी निवास बालुवाटारमा बसेको नौ दलीय गठबन्धनका शिर्ष नेताहरुको बैठकले केही दिनयता संविधान र लोकतान्त्रिक गणतन्त्रको मर्म विपरित भइरहेका केही क्रियाकलापप्रति आफुहरुको गम्भीर ध्यानाकर्षण भएको भन्दै संयुक्त विज्ञप्ति जारी गरेका छन् ।

‘केही दिनयता जनताको त्याग र बलिदानीबाट प्राप्त संविधान र लोकतान्त्रिक गणतन्त्रको मर्म एवंम् भावना विपरीत भइरहेका केही क्रियाकलापतर्फ हाम्रो गम्भीर ध्यानाकर्षण भएको छ,’ उक्त संयुक्त विज्ञप्तिमा भनिएको छ, ‘संविधानले नचिनेका, नखेदेका तथाकथित पदका नाममा गरिने संविधान बिपरितका गतिबिधि र तिनलाई सहयोग गर्ने क्रियाकलापहरु लोकतन्त्र विरोधि अवान्छित हुन भन्ने विषयमा हामी एकमत छौं । संविधान र लोकतान्त्रिक गणतन्त्रको रक्षाका लागि एकजुट भई अगाडि बढ्ने दृढता व्यक्त गर्दछौं ।’

गठबन्धनले शान्ति प्रक्रियाका बाँकी कामलाई विस्तृत शान्ति सम्झौता र संविधानको भावना अनुरुप तार्किक निष्कर्षमा पुर्याउन प्रतिबद्ध रहेको समेत विज्ञप्तिमा जनाइएको छ ।