फर्शुराम भुर्तेल, काठमाडौं । एकीकृत अखिल नेपाल शिक्षक संगठनको अध्यक्षमा शंकर अधिकारी पुनः निर्वाचित भएका छन् ।
चैत्र १ गते सम्पन्न सो संगठनको छैटौं राष्ट्रिय अधिवेशनबाट अधिकारी दोस्रो कार्यकालका लागि अध्यक्षमा निर्वाचित भएका हुन् । सत्तारुढ माओवादी निकट मानिने सो संगठनको अधिवेशनले अधिकारीको नेतृत्वमा २१ पदाधिकारीसहित ८३ सदस्यीय कार्यसमिति निर्वाचित गरेको बताईएको छ ।
संगठन श्रोतका अनुसार वरिष्ठ उपाध्यक्षमा मान बहादुर पाण्डे निर्वाचित भएका छन भने उपाध्यक्षहरूमा झपिन्द्र क्षेत्री, चेतना रेग्मी, पुष्प न्यौपाने, निमबहादुर केसी, किरण यादव, रेश्मिलाल चपाईं, सोम प्रसाद ढुंगाना निर्वाचित भएका छन ।
यसैगरी महासचिवमा कुलप्रसाद खतिवडा, अर्थ उपमहासचिवमा गणेशप्रसाद रिजाल र उपमहासचिवहरुमा बलबहादुर कार्की, नारायण अर्याल, झम्क चौलागाई र दिनेश यादव निर्वाचित भएका छन भने सचिवहरुमा गायत्री शर्मा, राम बहादुर खड्का, राजवीर महतो, कुवेर भेटवाल, नवराज शाही र देवीदत्त यादव निर्वाचित भएको जनाईएको छ । ९९ सदस्यीय कार्यसमिति मध्येका बाँकी सदस्य पछि मनोनित गरिने जनाइएको छ ।
सो संगठनको अधिवेशन फागुन २९ गते प्रधानमन्त्री पुष्पकमल दाहाल प्रचण्डले उद्घाटन गरेका थिए । एकीकृत वहुउद्देश्यीय शिक्षक भवन निर्माण, शहीद शिक्षक स्मृति प्रतिष्ठान दर्ता, अन्तर्राष्ट्रिय सम्बन्ध विस्तारमा नेतृत्व दिएका तथा संगठनलाई चुस्त र सक्रिय राखेका अधिकारी हालै सत्तारुढ माओवादीको बैकल्पीक केन्द्रीय सदस्यमा मनोनित भएका थिए ।
