काठमाडौं । पूर्वमन्त्री घनश्याम भुसाल एकीकृत समाजवादीको महासचिवमा मनोनित भएका छन् ।
एमालेबाट अलग भएर माधवकुमार नेपालको नेतृत्वमा गठन भएको एकीकृत समाजवादीले महासचिवमा एमाले परित्याग गरेका भुसाललाई महासचिवमा नियुक्त गरेको हो ।
आइतबार बसेको एकीकृत समाजवादीको केन्द्रीय सचिवालय बैठकले भुसाललाई महासचिवमा मनोनित गर्ने निर्णय गरेको हो । महासचिवको जिम्मेवारीमा रहेका बेदुराम भुसाललाई उपाध्यक्षमा मनोनित गर्दै बैठकले भुसाललाई महासचिवमा मनोनित गरेको हो ।
साथै बैठकले उपाध्यक्षहरु घनेन्द्र बस्नेत, केदार न्यौपाने, धर्मनाथ साह र केशवलाल श्रेष्ठलाई केन्द्रीय सचिवालय सदस्यमा मनोनित गरेको छ ।
मंसिरमा भएको प्रतिनिधिसभा निर्वाचनमा टिकट नपाएसँगै भुसाल एमाले छाड्दै स्वतन्त्र रुपमा उम्मेदवार बनेका थिए । उनलाई निर्वाचनमै तत्कालिन सत्ता गठबन्धनले सघाएको थियो ।
एमाले छाडेका भुसाल पुस २९ मा एकीकृत समाजवादी प्रवेश गरेका थिए ।
