Sansar News
काठमाडौं । नेकपा (एमाले) का उपाध्यक्ष एवं सांसद बिष्णु पौडेलले प्रधानमन्त्री पुष्पकमल दाहाल ‘प्रचण्ड’ले पुस १० मा बनेको गठबन्धनबाट पुरानै गठबन्धनमा फर्किनुको कारण बारे प्रश्न गरेका छन् ।
सोमबार प्रतिनिधि सभामा प्रधानमन्त्री प्रचण्डले पेस गरेको विश्वासको मतमाथिको प्रस्तावमा भएको छलफलमा बोल्दै पौडेलले पुस १० गते गठबन्धन बन्नुको पृष्ठभूमि उल्लेख गर्दै प्रधानमन्त्री प्रचण्ड अर्को दिनदेखि नै पुरानो गठबन्धनमा फर्किन खोजेको बताए ।
उनले यदि कांग्रेससहितको दलसँगको सहयात्रामा फर्किनु थियो भने १० पुसमा एमालेसँग किन सहयात्रा गरेको भनेर प्रश्न गरे । ‘हिजो प्रधानमन्त्री बन्न एमाले लगायत राजनीतिक दल चाहिने तर २ महिना पनि नपुग्दै, प्रधानमन्त्री पाउनेवित्तिकै दूरीको सम्बन्ध कायम गर्दै पुरानै गठबन्धनतिर फर्किन खोजे ।’
उनले पुस १० गते प्रधानमन्त्री बन्दा नै प्रचण्डले एमालेका राष्ट्रपति उम्मेदवारलाई मत दिने प्रतिवद्धता व्यक्त गरेको बताए ।
प्रचण्ड सरकारलाई विश्वासको मत दिनु पर्ने कुनै आधार र कारण नभएकाले एमालेले विश्वासको मत नदिने पौडेलले स्पष्ट पारे ।
वि.सं.२०७९ चैत ६ सोमवार १४:५८ मा प्रकाशित
