हामी सबैकाे संसारन्यूज

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले प्रधानमन्त्री पुष्पकमल दाहाललाई अनुभवि मानेर नयाँ गाडी चलाउन दिएको तर स्टार्ट नगर्दै पुरानै गाडीमा आम फालेको टिप्पणी गरेका छन् ।

सोमबार प्रतिनिधि सभाको बैठकमा प्रधानमन्त्री प्रचण्डले विश्वासको मत माग्दै गरेका बेला सम्बोधन गर्दै अध्यक्ष लिङ्देनले आफुहरुले प्रचण्डलाई नयाँ गाडी त्यो पनि हाइड्रोजन गाडि दिएको तर, प्रचण्डले ‘पुरानै गाडी चलाउँछु भनेर हिँडेपछि आफुहरुले केही गर्न नसेकेको टिप्पणी गरे ।

‘गाउँमा यस्तो ड्राइभर भेटिन्छन् । गाडी फेरिरहेका हुन्छन् । छिनछिनमा कहिले कस्को गाडी चलाउँछन् कहिले कस्को । मान्छेहरु भन्छन् गाडी फेरि रहन्छ । यो टिकाउ छैन’ अध्यक्ष लिङ्देनले भने, ‘कहिलेकाँही त्यस्तो गाडी फेरिरहने मान्छेलाई नयाँ गाडी दिँदा हुन्छ कि भन्ने लाग्छ । यो पटक राप्रपाले केही थान मन्त्रालयल लिएर मन्त्री हुने मनसाय राखेको थिएन । गाडी फेरिरहने ड्राइभर तपाईहरुको गाडी चलाउँछु भनेर आएपछि लाइसेन्स सहित आएपछि नयाँ गाडी त्यो पनि हाइड्रोजन गाडी दिएका थियौं तर ड्राइभर पुरानै गाडीतिर हाम फालेपछि हामीले के गर्ने ?’

उनले राप्रपासँग गाडी पनि छ । चलाउने सिप पनि छ तर, लाइसेन्स नभएकोले कुर्नुपर्ने अवस्था भएको बताए ।

उनले सबैलाई मिलाएर जाने भन्दै प्रचण्डले आफुहरुलाई धोका दिएको त्यो इतिहासले मूल्यांकन गर्ने समेत बताए ।