हामी सबैकाे संसारन्यूज

काठमाडौं । सरकारले आन्दोलनरत मिटर ब्याज पीडितसँग वार्ता गर्न समिति गठन गरेको छ । प्रधानमन्त्री पुष्पकमल दाहाल प्रचण्डले प्रधानमन्त्री कार्यालय, गृह मन्त्रालय र कानुन मन्त्रालयका प्रतिनिधिसहितको वार्ता समिति गठन गरेका हुन् ।

मिटरब्याज पीडितसँग वार्ता गर्न बनाइएको समितिमा प्रधानमन्त्री तथा मन्त्रिपरिषदको कार्यालयका उपसचिव उमाकान्त अधिकारी, गृह मन्त्रालयका सहसचिव रुद्रादेवी शर्मा, गृह मन्त्रालयकै उपसचिव दिलकुमार तामाङ र कानुन न्याय तथा संसदीय मामिला मन्त्रालयका उपसचिव जंगबहादुर डङ्गा छन् ।

वार्ता समितिले मिटरब्याज पीडितसँग छलफल गरी प्रधानमन्त्रीसमक्ष समाधानबारे विकल्पहरु पेश गर्ने प्रधानमन्त्रीका प्रेस संयोजन सूर्यकिरण शर्माले जानकारी दिएका छन् ।

यसैबीच, प्रधानमन्त्री प्रचण्डले आज मिटरब्याज पीडितलाई भेट्ने तयारी गरेका छन् । प्रधानमन्त्रीले पीडितहरुलाई भेटेरै मागबारे जानकारी लिने तयारी गरेका छन् । प्रधानमन्त्रीको सचिवालयले जनाएअनुसार केहीबेरमा भेट्ने तयारी छ ।

प्रधानमन्त्रीले आजै बस्ने मन्त्रिपरिषद्को बैठकबाट मिटर ब्याज पीडितको माग सम्बोधन गर्ने गरी तयारी गरेको बुझिएको छ । मिटर ब्याज पीडितले भन्दै आएको कानुनलाई पनि फास्ट ट्रयाकबाट सम्बोधन गर्ने तयारी गरिएको प्रधानमन्त्रीको सचिवालयले जनाएको छ ।