हामी सबैकाे संसारन्यूज

काठमाडौं । सातौं चितवन अन्तर्राष्ट्रिय औद्योगिक प्रदर्शनी २०८० आयोजना हुने भएको छ । ‘दिगो आर्थिक विकासका लागि बृहत अन्तर्राष्ट्रिय औद्योगिक प्रदर्शनी’ भन्ने अभियानसहित उद्यमशिलता विकास र औद्योगिक उत्पादकत्व वृद्धिमा सहयोग पु¥याउने उद्देश्यले प्रदर्शनी हुन लागेको हो ।

वैशाख २२, २३ र २४ गते चितवन प्रदर्शनी केन्द्र भरतपुर चितवनमा हुन लागेको उक्त प्रदर्शनीमा औद्यागिक मेसिनरी, प्रविधि र स्वदेशी औद्योगिक उत्पादनको बृहत प्रदर्शनी हुँदैछ ।

उद्योग वाणिज्य तथा आपूर्ति मन्त्रालयको सहयोग, चितवन उद्योग संघको आयोजना तथा नेपाल उद्योग परिसंघ र नेपाल घरेलु तथा साना उद्योग महासंघको अभिभावकत्व र मिडिया स्पेस सोलुसन्स प्रालि तथा फ्युचरएक्स ट्रेड फेयर एन्ड इभेन्टसको व्यवस्थापकीय साझेदारीमा प्रदर्शनी आयोजना गर्न लागिएको हो ।

उक्त प्रदर्शनीमा आधुनिक मेसिन, यन्त्र उपकरण र प्रविधिसहित निर्माण, कृषि, अटोमोबाइल, फर्निचर, इन्जिनियरिङ, मेटल, फर्मास्युटिकल्स, टेक्सटाइल, प्रिन्ट्रिङ, प्याकेजिङ, प्लाष्टिक, पर्यटन, फूड एन्ड बेभरेजे तथा अन्य सेवामूलक उद्योगको उत्पादनको बृहत प्रदर्शनीमा राखिनेछ । राष्ट्रिय तथा अन्तर्राष्ट्रिय गरी २०० भन्दा बढी स्टलहरु रहने गरी आयोजना हुन गइरहेको उक्त प्रदर्शनीको धमाधम स्टलहरु बुकिङ हुन थालेका छन् ।

यस प्रदर्शनीमा प्रदर्शकको रुपमा सहभागिता जनाउन चाहने उद्योगीहरुले यही १७ गतेसम्म स्टल बुकिङ गरिसक्नुपर्ने आयोजकले जनाएको छ । अवलोकनकर्तालाई निःशुल्क प्रवेशको व्यवस्था गरिएको छ । आयोजकले सम्पूर्णलाई अवलोकन गर्न अनुरोध गरेको छ ।