हामी सबैकाे संसारन्यूज

काठमाडौं । राष्ट्रपति रामचन्द्र पौडेलले भारतको नयाँदिल्लीमा गएर गराएको उपचारको सम्पूर्ण खर्च आफैं व्यहोर्ने भएका छन् । राष्ट्रपतिका प्रेस संयोजक खिला कार्कीले मंगलबार एक प्रेस नोट जारी गर्दै भारतमा भएको उपचार खर्च राष्ट्रपति पौडेलले ब्यहोर्ने बताएका हुन् ।

उनले प्रेस नोटमा लेखेका छन्, “पचारका क्रममा भएको उपचार खर्च सम्माननीय राष्ट्रपतिज्यू स्वयम्ले व्यहोर्न चाहेको कुरा जानकारीका लागि अवगत गराइन्छ ।”

पौडेल छातीमा समस्या देखिएपछि त्रिवि शिक्षण अस्पतालका चिकित्सकहरुको सुझाबमा भारतको एम्स अस्पतालमा उपचार गर्न गएका थिए । वैशाख ६ मा भारत पुगेका पौडेल उपचारपछि वैशाख ११ मा स्वेदश फर्किएका थिए ।

विशिष्ट व्यक्तिहरुको उपचार खर्च सरकारले व्यहोरेको भन्दै आलोचना भइरहेका बेला पौडेलको उपचारबारे पनि टिप्पणी उठेको थियो । पौडेलले आफुँमाथि टिप्पणी उठेपछि प्रेस नोटमार्फत आफैंले व्यहोर्ने जनाएका हुन् ।