हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल प्रचण्डले २५६७ औं बुद्ध जयन्ती र किरातहरूको महान् पर्व उभौलीको अवसरमा स्वदेश तथा विदेशमा रहने नेपालीहरुमा शुभकामना व्यक्त गरेका छन् ।

प्रधामन्त्री प्रचण्डले आजभन्दा २५६७ वर्ष पहिला नेपालको लुम्विनीमा जन्मिएका बुद्धको ज्ञान, आदर्श र शान्तिको मार्ग विश्वभरि नै अद्वितीय रहिआएको बताउँदै बुद्ध भौतिकवादी र द्वन्द्ववादी दुबै रहेको बताएका छन् ।

‘वर्गीय समाज र दुःखको सार्वभौम चरित्रको वस्तुगत धरातलमा उभिएर उहाँले भिक्षु संघको परिकल्पना र अभ्यास दुबै गर्नुभयो । दर्शनको क्षेत्रमा मात्र नभएर चिन्तन र समाज विज्ञानको क्षेत्रमा उहाँको योगदान विश्वव्यापी रूपमा सर्वमान्य छ । तसर्थ, पूर्वीय दर्शन र सभ्यताको पछिल्लो युगमा बुद्ध सबैभन्दा प्रख्यात र मान्य व्यक्तित्व हुनुभयो ।’ शुभकामना सन्देशमा भनेका छन् ।

नेपालको भूमिमा जन्मिएका शान्तिका अग्रदुत बुद्धले सम्पूर्ण मानव जातिको कल्याणको संकल्पसहित गृहत्याग गरी कठोर परिश्रमबाट बोधीज्ञान प्राप्त गरेको प्रसङ्ग आज पनि उत्तिकै महत्वपूर्ण मानिएको प्रधानमन्त्रीले बताएका छन् ।

‘बुद्धको दर्शन र विचारले अहिंसा, सद्भाव, मानव कल्याण र मानिसकै जीवनमा शान्तिको बाटो देखाएकोले उहाँका विचारहरू विश्वभरि लोकप्रिय र कालजयी रहन सकेका हुन् । मानव जातिको सर्वाङ्गीण हित र शान्तिका लागि उहाँले गर्नुभएको त्याग, लिनुभएको विचार र अभ्यास नेपालीहरूका लागि विशेष ऐतिहासिक गौरवका विषय हुन् । आजको सन्दर्भमा बुद्धको दर्शन र शिक्षाप्रति गौरव गर्दै मानव जातिको हितका पक्षमा आपसी सद्भाव, सहकार्य एवं एकताका साथ अग्रसर हुनु नै बुद्धप्रति सच्चा सम्मान हुन जान्छ ।’ उनले भनेका छन् ।

प्रधानमन्त्रीले बुद्ध दर्शन, बुद्धको जन्मभूमि लुम्बिनी र महत्वपूर्ण सबै बौद्धक्षेत्रहरूको प्रवद्र्धन र विकास गर्न नेपाल सरकार प्रतिवद्ध रहेको जानकारी दिँदै बुद्ध जयन्तीले सामाजिक न्याय, सुशासन र समृद्धिको लक्ष्यमा अगाडि बढ्न हामी सबैलाई प्रेरणा प्रदान गर्ने विश्वास व्यक्त गरेका छन् ।

उभौलीको शुभकामना
त्यसैगरी किरात राईहरुको उभधौली पर्वका अवसरमा शुभकामना दिँदै प्रधामन्त्री प्रचण्डले भनेका छन् ‘नेपाल बहुजातीय, बहुभाषिक, बहुधार्मिक र बहुसांस्कृतिक विशेषतायुक्त स्वाधीन र समुन्नत मुलुक हो । हाम्रा चाडपर्व, भेषभुषा, संस्कार–संस्कृतिहरू राष्ट्रिय एकताका सेतुमात्र नभएर समुन्नत नेपाल निर्माणका आधारशीलासमेत हुन् । ऐतिहासिक कालदेखि आफ्नो जीवनवृत्तिका क्रममा विभिन्न जाति र समुदायले हासिल गरेका अनुभव र प्राप्त ज्ञानको श्रृंखला नै सभ्यता र संस्कृतिको स्रोत पनि हो । यस अर्थमा नेपालका विभिन्न जातिहरूले मनाउने पर्वहरू हाम्रा ऐतिहासिक गौरवगाथा र प्रेरणाका स्रोत हुन् ।’

कृषि युगमा प्रवेश गरेपश्चात् प्रचलनमा आएको उभौली पर्व नेपालजस्तो कृषिप्रधान मुलुकका लागि थप प्रेरणादायी र सन्देशमुलक रहेको बताउँदै प्रकृतिलाई खुसी तुल्याएर भूमिबाट बढीभन्दा बढी लाभ लिने परम्परा संस्कृतिका दृष्टिले मात्र नभएर समृद्धि र विकासको चेतबाट समेत वैज्ञानिक र प्रगतिशील देखिएको प्रधामनन्त्रीले बताएका छन् । ‘तसर्थ, उधौली पर्व किरात समुदायका साथै उत्पादनशील चेतका समस्त नेपालीहरूको समेत पर्वको रूपमा स्थापित हुँदै गएको छ ।’ उनले भनेका छन् ।

नेपालको संविधानले सबै वर्ग, जाति, क्षेत्र, लिंग र समुदायको पहिचान र अधिकारको संवैधानिक व्यवस्था गरेको र संविधानमा व्यवस्था भएबमोजिमका अधिकारको प्रगतिशील कार्यान्यवन आजको हाम्रो मुख्य दायित्व रहेको बताउँदै उनले भनेका छन्, ‘यही यथार्थलाई आत्मसात गर्दै वर्तमान सरकार सामाजिक न्याय, सुशासन र समृद्धिको प्राथमिकतासहित संघीय लोकतान्त्रिक गणतन्त्रको सुदृढीकरण र संविधानको कार्यान्वयनमा दृढतापूर्वक अगाडि बढिरहेको छ । सरकारको यस प्रयासमा सम्पूर्ण जनसमुदायको साथ र सहयोग रहने मैले विश्वास लिएको छु ।’

उनले उधौली पर्वले समान अधिकारका साथ सबै वर्ग, जाति, लिंग र समुदायको भाषा, कला, संस्कृतिको संरक्षण र प्रवर्धनसहित राष्ट्रिय एकतालाई थप सुदृढ गर्न सकोस् भन्ने कामना समेत गरेका छन् ।