काठमाडौं । प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले क्यान्टोन्टमेन्ट प्रकरणमा दोषी ठहरिए जेल जान तयार रहेको बताएका छन् । प्रतिनिधिसभाको बिहीबारको बैठकमा भएको प्रश्नोत्तर श्रृंखलामा राप्रपा सांसद ज्ञानेन्द्रबहादुर शाहीको प्रश्नको जवाफ दिँदै प्रचण्डले यस्तो बताएका हुन् ।
प्रचण्डले क्यान्टोन्मेटको कुरा कपोलकल्पीत र पूर्वाग्रही भएको बताए । तत्कालिन सरकार, अनमिन सबैको रोहबरमा लडाकुलाई बाँडिएको रकम प्रक्रियागतरुपमा गएको प्रचण्डको भनाई छ ।
“क्यान्टोन्टमेन्टको कुरा कलोलकल्पीत र पूर्वाग्रही छ भन्ने मेरो दृढ विश्वास छ, फेरि पनि कसैले दिएको उजुरीको आधारमा छानबिन गरेर दोषी ठहरिए म आफैं जेल जान तयार रहेको छु”, प्रचण्डले भनेका छन्, “गिरिजाप्रसाद कोइराला प्रधानमन्त्री र रामशरण महत अर्थमन्त्री हुनुहुन्थ्यो, उहाँहरु समेतले रुजु गरिसकेपछि त्यो पटाक्षेप भइसकेको कुरा हो । त्यो रकम जुन राज्यबाट दिइयो, त्यसको अडिट भएर टुंगिएको विषय राजनीतिक आग्रहसाथ ल्याइएको भन्ने मेरो बुझाई छ ।”
तथापी, आफुँ सबै घटनाहरुको छानबिन गर्न तयार रहेको स्पष्टीकरण प्रचण्डले दिएका छन् । २०४८ सालदेखि यताका सबै घटना र उच्च पदस्थहरुको सम्पत्ति छानबिन हुनुपर्ने उनको भनाई छ ।
प्रचण्डले भनेका छन्, “मैंले दलको घोषणापत्रमै २०४८ सालदेखि यताका सबै घटनाहरुको, सबै उच्च पदस्थ अधिकारीहरुको सम्पत्तिको छानबिनको सन्दर्भमा र विभिन्न कालखण्डमा उठेका भ्रष्टाचारसँग सम्बन्धित सबै मुद्दाहरुमा छानबिन गर्नुपर्छ भनेको छु, हामी सबै राजनीतिक तहमा एउटा संकल्पको साथ सहमति गरेर जाँदा सबै चीज छानबिन गर्न सकिन्छ । देशमा सुशासनको, भ्रष्टाचारबाट उन्मुक्तिको एउटा नयाँ युग सुरु गर्न सकिन्छ ।”
वि.सं.२०८० जेठ ४ बिहीवार १३:४६ मा प्रकाशित