Sansar News
काठमाडौं। नेपाल राष्ट्र बैंकले आर्थिक वर्ष २०८३/८४ का लागि २५ औँ मौद्रिक नीति सार्वजनिक गर्दै आर्थिक वृद्धि, मूल्य स्थिरता र वित्तीय प्रणालीलाई थप सुदृढ बनाउने लक्ष्य लिएको छ। यस वर्षको मौद्रिक नीतिले लचिलो तर सतर्क नीति अवलम्बन गर्दै निजी क्षेत्रको मनोबल बढाउने, लगानी विस्तार गर्ने र बैंकिङ प्रणालीलाई थप प्रभावकारी बनाउने दिशामा केन्द्रित रहेको जनाएको छ।
सरकारले लिएको ७ प्रतिशत आर्थिक वृद्धिदर हासिल गर्न सहयोग पुग्ने गरी मौद्रिक नीति तयार गरिएको राष्ट्र बैंकले जनाएको छ। साथै आगामी आर्थिक वर्षमा मुद्रास्फीति ५.५ प्रतिशतभित्र सीमित राख्ने लक्ष्य निर्धारण गरिएको छ।
हाल विदेशी मुद्रा सञ्चिति सन्तोषजनक रहेको, विप्रेषण (रेमिट्यान्स) र पर्यटन आम्दानी उच्च रहेकाले बाह्य क्षेत्र बलियो अवस्थामा रहेको राष्ट्र बैंकको निष्कर्ष छ। यद्यपि अन्तर्राष्ट्रिय बजारमा पेट्रोलियम पदार्थ र खाद्यवस्तुको मूल्यवृद्धिका कारण केही समय मुद्रास्फीतिमा दबाब रहने उल्लेख गरिएको छ।
मौद्रिक नीतिअनुसार नीतिगत ब्याजदर, बैंकदर र स्थायी निक्षेप सुविधा दर यथावत् राखिएको छ। अनिवार्य नगद अनुपात (CRR) तथा वैधानिक तरलता अनुपात (SLR) मा पनि कुनै परिवर्तन गरिएको छैन।
बैंकिङ क्षेत्र सुधारका लागि राष्ट्र बैंकले व्यक्तिगत जमानीका आधारमा हुने असीमित दायित्व हटाउने, चेक अनादरका कारण हुने कालोसूची व्यवस्थामा सुधार गर्ने, रुग्ण उद्योगका निष्क्रिय कर्जा व्यवस्थापन गर्ने, शेयर धितो कर्जालाई संस्थाको सबलतासँग जोड्ने तथा सार्वजनिक विद्युतीय सवारी साधनमा कर्जा प्रवाह सहज बनाउने नीति लिएको छ।
त्यसैगरी, बैंक तथा वित्तीय संस्थाका निर्देशनहरू सरल बनाउने, विदेशी विनिमय कारोबार सहज गर्ने, Peer-to-Peer (P2P) Lending सम्बन्धी अध्ययन गर्ने तथा डिजिटल बैंकिङ विस्तारमार्फत वित्तीय सेवाको लागत घटाउने योजना पनि सार्वजनिक गरिएको छ।
राष्ट्र बैंकले मुद्रास्फीति वा वित्तीय स्थायित्वमा चुनौती देखिएमा आवश्यकताअनुसार मौद्रिक नीतिको पुनरावलोकन गरिने स्पष्ट पारेको छ। साथै, नीतिगत स्थिरता कायम राख्दै बजारमा विश्वास बढाउने प्रतिबद्धता पनि जनाएको छ।
आर्थिक गतिविधिलाई गति दिने, निजी क्षेत्रको लगानी प्रोत्साहन गर्ने र वित्तीय प्रणालीलाई थप मजबुत बनाउने उद्देश्यसहित आएको यस मौद्रिक नीतिले आगामी आर्थिक वर्षको आर्थिक दिशालाई महत्वपूर्ण रूपमा प्रभावित गर्ने अपेक्षा गरिएको छ।
वि.सं.२०८३ असार २३ मंगलवार १७:३४ मा प्रकाशित
