काठमाडौं । रोल्पाको थवाङ गाउँपालिका मिरुलका ४३ वर्षीय हरि बुढा मगरले सर्वोच्च शिखर सगमाथा आरोहण गरेर विश्व किर्तीमानी कायम गरेका छन् ।
दुवै खुट्टा गुमाएका पूर्व ब्रिटिश गोर्खा सैनिक बुढा मगरले शुक्रबार दिउँसो ३ बजे सगरमाथाको चुचुरोमा पुगेर विश्व किर्तीमानी कायम गर्न सफल भएका हुन् । घुँडामुनि दुवै खुट्टा गुमाएका बुढामगर सगरमाथाको चुचुरो चुम्ने पहिलो व्यक्ति बनेर विश्व रेकर्ड कायम गरेका हुन् ।
ब्रिटीश सेनामा रहँदा सन् २०१० मा अफगानिस्तानको लडाइँमा घुँडामुनि दुवै खुट्टा गुमाएका बुढामगरले पाँचवर्षको प्रयासपछि कुत्रिम खुट्टाको सहारामा सगरमाथाको चुचुुरो चुम्न सफल भएका हुन् ।
गोर्खा रेजिमेन्टमा १५ वर्ष सेवा गरेका बुढामगरले सेनामा भर्ति हुन भन्दा पहिलो सगरमाथाको चुचुरो चुम्ने रहर भएको र उक्त सपना अहिले पूरा गरेकोमा खुसी व्यक्त गरेका छन् ।
उनको आरोहणमा एचएसटी एडभेन्चर्सका कृष थापा एक्सपिडिसन लिडरका रुपमा रहेका थिए । बुढामगरले शारीरिक अशक्तता रहेकाहरु कमजोर हुँदैनन् भन्ने आत्मविश्वास दिलाउन पनि सगरमाथाको आरोहण गरेको बताएका छन् । उनले आफुलेजस्तै शारीरिक अपांगता भएका अन्य व्यक्तिले पनि सगरमाथाको चुचुरो चुमेर आफ्नो सपना पूरा गर्न सक्छन् भन्ने सन्देश दिन सफल भएको बताएका छन् ।
बुढा मगरले यसअघि मोन्ट ब्लाङ्क ४,८१० मिटर, चुलु सुदूरपुर्व ६,०५९ मिटर, किलिमन्जारो ५,८९५ मिटर, र मेरा पिक ६,४७६ मिटर लगायतका हिमालको सपल आरोहण गरिसकेका छन् ।
