हामी सबैकाे संसारन्यूज

काठमाडौं । नेपाल प्रहरीले नक्कली भुटानी शरणार्थी प्रकरणमा प्रहरी महानिरीक्षक (आइजिपी) बसन्तकुमार कुँवरलाई जोडेर चर्चा गरिनु निन्दनीय भएको बताएको छ । बुधबार प्रहरी प्रवक्ता कुवेर कडायतद्धारा एक प्रेस विज्ञप्ति जारी गर्दै कुनै व्यक्तिले गरेको संवादकै आधारमा महानिरीक्षकलाई विवादमा तानिनु गलत भएको बताएको हो ।

प्रहरीले कुनै आधार, तथ्य र प्रमाणबिना नै महानिरीक्षकविरुद्ध समाचार आएको भन्दै उक्त समाचारले प्रहरी संगठनकै विश्वसनीयता, छवि तथा चेन अफ कमाण्डमा समेत आँच पुर्‍याएको बताएको छ ।

“कुनै आधार, तथ्य र प्रमाणबिना अपराध अनुसन्धानजस्तो संवेदनशील विषयमा सम्प्रेषण गरिएको समाचारले जनमानसमा भ्रम सिर्जना हुन जाने र नेपाल प्रहरी संगठनकै विश्वसनियता, छवि तथा चेन अफ कमाण्डमा समेत आँच आउने हुँदा उक्त समाचारहरूप्रति नेपाल प्रहरी प्रधान कार्यालय पूर्ण असहमति प्रकट गर्दछ”, विज्ञप्तिमा भनिएको छ ।

प्रहरीका जुनियरदेखि सिनियर अधिकृतहरुले आफ्नो जीवन र करिअरको समेत प्रवाह नगरी गरेको अनुसन्धानले नै अहिलेको प्रकरण बाहिर आएको प्रहरीको दाबी छ । कयौं व्यक्तिमाथि अनुसन्धान गर्नुपर्ने काम बाँकी नै रहेको अवस्थामा प्रहरी संगठनलाई नै बदनाम गराउने गरी आएका यस्ता समाचारले प्रहरी अधिकृतहरुको मनोबलमा समेत असर पर्ने प्रहरीको भनाई छ ।

मंगलबार केही सञ्चार माध्यमले प्रहरी महानिरीक्षकलाई जोडेर नक्कली शरणार्थी प्रकरणका विभिन्न आरोपितलाई जोगाउन चलखेल भएको भन्दै समाचारहरु प्रकाशित गरेका थिए । पूर्वगृहमन्त्री बालकृष्ण खाँणलाई जोगाउन महानिरीक्षक कुँवरले गिरोह सदस्यसँग छलफल गरेको दाबी सञ्चार माध्यमकाे छ ।