हामी सबैकाे संसारन्यूज

काठमाडौं । नेकपा एमालेका ७४ जना जिल्ला नेताहरुले सामुहिक राजीनामा दिएका छन् ।

पार्टीका जिल्ला नेतृत्वमा रहेकाहरुले पार्टी सुधारको मागलाई बेवास्ता गरेको भन्दै नेकपा एमाले सिद्धार्थनगर नगर कमिटीका सचिव सहित ७४ जनाले राजीनामा दिएका हुन् ।

उनीहरुले सोमबार भैरहवामा पत्रकार सम्मेलन गरी नगर सचिव नारायणप्रसाद भण्डारीसहित नगर कमिटी र विभिन्न जनवर्गिय संगठनका नेताहरुले राजीनामा दिएको घोषणा गरेका हुन् ।

उक्त पत्रकार सम्मेलनमा नगरसचिव भण्डारीले पार्टी सुधारका लागि आफुहरुले १० बुँदे मागसहित सुझाव पत्र पेश गरिएकोमा जिल्ला नेतृत्वले त्यसलाई बेवास्ता गर्दै उल्टै कारबाहीको धम्की दिएको आरोप लगाए । उनले पार्टीभित्र गुटगत राजनीति मौलाएको आरोप लगाउँदै आफुहरु राजीनामा दिनुपरेको बताए ।

‘पार्टीलाई विधि प्रक्रिया र संस्थागत रुपले अघि बढाउनुपर्छ भनेर ५१ जना कार्यकर्ताले पार्टी सुदृढीकरण तथा संगठनात्मक सुधारको लागि एक महिनाअघि सुझाव पत्र पेस गरेका थियौं,’ भण्डारीले भने, ‘तर हाम्रा माग सम्बोधन गरी पार्टीलाई सुदृढ बनाउने भन्दा निरंकुश शैलीमा गुटगत पूर्वाग्रह राखेर पार्टीबाट निस्किएर गए हुन्छ भने ढंगबाट व्यवहार भएपछि राजीनामा गर्न बाध्य भयौं ।’

राजीनामा दिएक दिँदै आफुहरुको १० बुँदे माग सम्बोधन भएमा पार्टीमा फर्किने बताएका उनीहरुले तत्काल स्वतन्त्र नागरिक अभियान बनाएर अघि बढ्ने जानकारी समेत पत्रकार सम्मेलनमा दिएका छन् ।