हामी सबैकाे संसारन्यूज

काठमाडौं । नाडा अटोमोबाइल्स एसोसिएसन अफ नेपाल (नाडा) का प्रतिनिधिमण्डल र भन्सार विभागका महानिर्देशक शोभाकान्त पौडेलको भेटवार्ता भएको छ ।

शुक्रबार नाडाका अध्यक्ष ध्रुव थापाको नेतृत्वमा गएको टोलीले पौडेलसँग भेट गरी वीरगञ्ज भन्सार कार्यालय, पर्साले आगामी साउन १ गतेपछि पैठारी हुने तयारी मालवस्तु बजारमा बिक्रीवितरणका लागि पठाउनु अघि त्यस्ता त्यसको प्याकिङमा आयातकर्ता र बजार वितरकको पूरा विवरण भएको लेवल लगाएर मात्र पठाउनुपर्ने भन्ने विषयमा जारी गरेको सूचनालगायत व्यवसायीहरुलाई भन्सारमा परेको समस्याका बारेमा विस्तृत छलफल गरेको छ ।

उक्त छलफलमा नाडाका अध्यक्ष थापाले सो सम्बन्धमा जिज्ञासा राख्दै सो सूचनामा उल्लेखित विषय कुन क्षेत्रमा लागू गर्ने भनिएको हो प्रष्ट नभएको र अटोमोबाइल स्पेयर पार्टसका कतिपय वस्तुमा यस्तो व्यवस्था लागू गर्न कठिनाइ हुने भनाइ राखे । त्यसैगरी सो छलफलमा नाडाका महासचिव सुरेन्द्रकुमार उप्रेतीले त्यसको कार्यान्वयमा आउने व्यावहारिक समस्या र अप्ठयाराहरु बारे जिज्ञासा राखेका थिए ।

सो छलफलमा महानिर्देशक पौडेलले विदेशबाट धेरै नक्कली सामान पैठारी भई आउने भएकोले वैध व्यवसायलाई प्रोत्साहित गर्न र तस्करी र चोरी पैठारीलाई निरुत्साहित गर्न यस्तो व्यवस्था गर्न लागेको जानकारी दिँदै अटोमोबाइल स्पेयर पार्टसको आयातमा पनि यो व्यवस्था लागू हुने बताए । साथै उनले अटोमोबाइल स्पेयर पार्टसका केही वस्तुमा यस्तो व्यवस्था गर्न कठिनाइ हुने भए पनि यस सम्बन्धमा विभागले छिट्टै कार्यविधिसमेत ल्याउन लागेको जानकारी दिए ।

त्यसैगरी सो छलफलमा महानिर्देशक पाडैलले यसको सम्पूर्ण व्यवस्थापन स्वयं पैठारीकर्ता र डिलरले गर्नुपर्ने भएकोले साधारण खुद्रा व्यवसायीलाई कुनै अप्ठेरो र झन्झट पनि नहुने कुरा प्रष्ट पारे ।

विभागका उपमहानिर्देशकद्वय सेवन्तक पोखरेल र रमेश अर्यालसमेतको उपस्थिति रहेको सो छलफलमा नाडाका सचिव विक्रम सिंहानिया, कोषाध्यक्ष मिलनबाबु मल्ल र केन्द्रीय कार्य समिति सदस्य प्रकाश कपुरीको उपस्थिति रहेको थियो ।