हामी सबैकाे संसारन्यूज

काठमाडौं । भन्सार जाँचपासबाटै एक सय किलो सुन बाहिरिएको घटनापछि उपप्रधान तथा गृहमन्त्री नारायणकाजी श्रेष्ठले त्रिभुवन अन्तराष्ट्रिय विमानस्थलको अध्यागमन र भन्सार निरीक्षण गरेका छन् ।

निरीक्षणमा गृहमन्त्रीसँगै नेपाल प्रहरी प्रमुख, राष्ट्रिय अनुसन्धान विभागका प्रमुख, राजश्व अनुसन्धान विभागका प्रमुख र अध्यागमन कार्यालय प्रमुखलाई पनि गएका थिए ।
भन्सारको सुरक्षा जाँचपास गर्ने मेसिनलगायतको कमजोरी बाहिरिएपछि गृहमन्त्री निरीक्षणमा गएका हुन् ।

गत बुधबार साँझ अन्तर्राष्ट्रिय विमानस्थल भन्सार कार्यालयबाट बाहिरिएको करिब एक क्विन्टल सुन राजश्व अनुसन्धान विभागको टोलीले बरामत गरेको थियो ।

सुन प्रकरणमा विदेशी नागरिकसहित प्रहरीले १० जनालाई पक्राउ गरिसकेको छ । खरिदार कुमार ढकाललाई निलम्बन गरिसकिएको छ भने भन्सार अधिकृत सन्तोष चन्दलाई निलम्बनका लागि अर्थ मन्त्रालयमा सिफारिस गरिएको छ ।