हामी सबैकाे संसारन्यूज

काठमाडौं । प्रितम सिंहबारे प्रधानमन्त्री पुष्पकमल दाहाल प्रचण्डले दिएको अभिव्यक्तिलाई लिएर एमालेले गत असार तेस्रो साता संसद अवरुद्ध गर्‍यो । प्रधानमन्त्री प्रचण्डको राजीनामा नै माग गर्दै चार दिन (असार २०देखि २४ गते)सम्म संसद चल्न दिएन । तर, निर्विकल्प राजीनामाको अडानमा देखिएको एमालेले असार २५ मा कुनै कारण बिनै संसद खुलाउन सहमति दियो ।

प्रितम सिंहबारे दिएको अभिव्यक्तिलाई लिएर प्रधानमन्त्रीले संसदमा सम्बोधन गरे । उनको संम्बोधन चित्त नबुझेको बताएको एमाले त्यसपछि मौन बन्यो ।

प्रधानमन्त्री प्रचण्डको राजीनामा माग गर्दै एमालेले संसद अवरुद्ध गर्दा सुरुमा प्रतिपक्षी दलहरु रास्वपा र राप्रपाले पनि सहयोग गरेका थिए । तर, एमाले नै आफ्नै अडानमा नदेखिएपछि दुवै दल हच्किए ।

जुन घटना अन्य दलका निम्ति राम्रो पाठ सिकाइको विषय पनि बनेको देखियो । रास्वपा र राप्रपाले सार्वजनिकरुपमै ‘एमालेको पछि लाग्नु गल्ति भएको’ बताउनु पर्ने अवस्था बन्यो ।

गत बुधबार भन्सार जाँचपासबाट बाहिरिएको एक सय किलो सुन राजस्व अनुसन्धान विभागको टोलीले बरामत गरेको घटनालाई लिएर फेरि एमालेले संसद अवरुद्ध गर्ने तयारी गरेको छ । एमालेले गृहमन्त्री र अर्थमन्त्रीको राजीनामा माग गर्ने संसद अवरुद्धको तयारी गरेको छ । एमालेका प्रमुख सचेतक पदम गिरीका अनुसार गृहमन्त्री र अर्थमन्त्रीले नैतिकताका आधारमा राजीनामा दिनुपर्छ ।

“गृह र अर्थमन्त्रीले सुन काण्डको नैतिक जिम्मेवारी लिनुपर्छ, यो कुरा संसदमा हामी जोडदाररुपमा उठाउँछौं”, उनले भनेका छन् ।

तर, एमालेको पछिल्लो मागमा राप्रपा र रास्वपा पछि नलाग्ने भएको छ । राप्रपाले घटनाबारे जवाफ माग्ने तयारी गरेको भएपनि रास्वपा भने सरकारलाई नै सहयोग गर्ने लाइनमा देखिएको छ । रास्वपाले सरकारको काम सराहनीय भएको भन्दै अनुसन्धानलाई अघि बढाउन आग्रह गरेको छ । रास्वपाका प्रमुख सचेतक सन्तोष परियारका अनुसार यो प्रकरणमा रास्वपा एमालेको पछि लाग्दैन ।

“सरकारले अनुसन्धानलाई तिव्ररुपमा अगाडि बढाओस्, यो अनुसन्धानमै रहेको विषय हो, यसमा हामी बोल्न आवश्यक छैन”, परियारले भनेका छन्, “यो घटनामा रास्वपा एमालेको पछि लाग्दैन ।”

निरन्तर फेरिने शैली र अडानबाट विपक्षी दलहरु एमालेप्रति विश्वस्त हुने अवस्थामा देखिएका छैनन् । घटनाक्रमले एमालेप्रति दलहरुभित्र अविश्वास पनि पैदा हुँदै गरेको देखाउँछ । घटनाक्रम संसदमा प्रतिपक्षी दलहरु विभाजित भएको र एमाले एक्लिएको देखाउँछ ।