हामी सबैकाे संसारन्यूज

काठमाडौं । नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले भ्रष्टाचारमा संलग्नहरुको कारबाही प्रक्रियामा पार्टीकै नेताहरु परे पनि नछाड्ने चेतावनी दिएका छन् ।

बुधबारदेखि राजधानीमा आयोजित केन्द्रीय समितिको बैठकको दोस्रो दिनमा आफ्नो धारणा राख्दै उपप्रधान तथा गृहमन्त्री समेत रहेका श्रेष्ठले भ्रष्टाचारका विरुद्ध चालिएको सरकारको अभियान नरोकिने बताउँदै सुन तस्करी प्रकरणमा जो कोही भएपनि नछाडिने चेतावनी दिएका हुन् ।

‘भ्रष्टाचार, तस्करी लगायतका फाइल खोल्दा हामीले को पर्छ भनेर हैन, जो परेपनि नछाड्ने दृढता लिएका छौं,’ गृहमन्त्री श्रेष्ठले भने, ‘पार्टी भित्रका परे पनि पछाडि नहट्ने संकल्प लिएका छौं ।’

नेता श्रेष्ठले सरकारले अहिले इतिहासकै उत्कृष्ठ काम गरेको बताउँदै त्यसको जति प्रचार हुनुपर्ने हो नभएकोले विपक्षीले सरकारमाथि फैलाएको भ्रम चिर्न नसकिएको बताए ।

बुधबारदेखि सुरु भएको केन्द्रीय समितिको  चौथो पूर्ण बैठकमा अध्यक्ष प्रचण्डको प्रतिवेदनमा धारणा राख्ने क्रम जारी रहेको छ ।