हामी सबैकाे संसारन्यूज

काठमाडौं । नेपाल विद्युत प्राधिकरणका कर्मचारीहरुको सेवा सुविधा बृद्धि भएको छ । शुक्रबार प्राधिकरणको वार्षिक उत्सव कार्यक्रममा प्राधिकरणका कार्यकारी निर्देशक कुलमान घिसिङले कर्मचारीको सेवा सुविधा बृद्धिको घोषणा गरेका हुन् ।

घिसिङले घोषणा गरेअनुसार प्राधिकरणले कर्मचारीहरुले पाइआएको वार्षिक उत्सव भत्ता १५ हजारलाई निरन्तरता दिएको छ भने महिला कर्मचारीहरुलाई प्रशुति भत्ता सात हजार ५०० बाट बढाएर १५ हजार बनाइएको छ ।

यस्तै, प्राधिकरणले कर्मचारीलाई विद्युतीय सवारी साधन खरिदमा पाँच लाखसम्म अनुदान दिने भएको छ । यसअघि प्राधिकरणले तीन लाख रुपैयाँसम्म अनुदान दिँदै आएको थियो ।

यस्तै, शैक्षिक अनुदान ३० हजार पुर्‍याएको छ भने दैविक प्रकोप अनुदान ४० हजार पुर्‍याएको छ ।

कर्मचारीको निधन भएमा काजक्रिया खर्चसमेत उपलब्ध गराउने व्यवस्था प्राधिकरणले गरेको छ । यस्तै, प्राधिकरणले कर्मचारीको आवास खर्चमा थप एक हजार रुपैयाँको समेत व्यवस्था गर्ने भएको छ ।

प्राधिकरणले अफिसमा शिशु स्याहार केन्द्र समेत स्थापना गर्ने भएको छ । जुन घोषणासँगै बालबच्चा भएका कर्मचारीलाई काम गर्न सहज हुनेछ ।