हामी सबैकाे संसारन्यूज

काठमाडौं । राजनीतिक दलबीच सुन तस्करी प्रकरणका विषयमा छानविन गर्नका लागि उच्चस्तरीय समिति बनाउन सहमति भएको छ ।

सोमबार राति सिंहदरबारमा बसेको दलहरुको बैठकले साउन ३ गते त्रिभुवन विमानस्थलबाट राजस्व अनुसन्धान विभागको टोलीले बरामद गरेको सुन तस्करी प्रकरणमा उच्चस्तरीय छानविन समिति बनाउने विषयमा सैद्धान्तिक सहमति गरेको हो ।

सोहि सुन प्रकरणमा उच्चस्तरीय छानविन समिति बनाउन भन्दै साउन १० गतेदेखि संसद बैठक अवरुद्ध गर्दै आएको एमालेले आइतबार प्रधानमन्त्री पुष्पकमल दाहाल ‘प्रचण्ड’ ले आव्हान गरेको राष्ट्रिय मान्यता प्राप्त दलहरुको बैठकमा पनि सोहि अडान राखेपछि अवरुद्ध संसद खुलाउने विषयमा सहमति हुन नसकेपछि सोमबार पुनः बैठक बसेको थियो ।

सोमबार बसेको बैठकले उच्चस्तरीय छानविन समिति बनाउने विषयमा सहमति जुटाउँदै समितिका टिओआर तय गर्नका लागि तीन सदस्यीय कार्यदल बनाउने निर्णय समेत गरेको हो ।

समितिको टिओआर तय गर्नका लागि एमाले संसदीय दलका उपनेता सुवास नेम्वाङ, माओवादी केन्द्रका प्रमुख सचेतक हितराज पाण्डे र नेपाली कांग्रेसका प्रमुख सचेतम रमेश लेखक रहेको तीन सदस्यीय कार्यदल बनाइएको हो ।

उच्चस्तरीय समितिको टिओआर आज बिहान ११ बजेसम्म तय भएपछि दिउँसो २ बजे पुनः शिर्ष नेताहरुको बैठक बस्ने बताइएको छ ।

बैठकमा सहभागि राष्ट्रिय स्वतन्त्र पार्टीका सभापति रवि लामिछानेले उच्चस्तरीय समिति गठनका लागि दलहरुबीच सहमति भएको प्रतिक्रिया दिएका छन् भने नेपाली कांग्रेसका प्रमुख सचेतक रमेश लेखकले बैठकमा दलहरुबीच सकारात्मक छलफल भएको बताएका छन् ।

त्यस्तै नेकपा एमालेका प्रमुख सचेतक पदम गिरीले दलहरुबीच उच्चस्तीयर समितीको ड्राफ्ट बनाउने विषयमा तीन नेता रहेको कार्यदल बनाइएको र यसरी सकारात्मक रुपमा काम अगाडि बढ्दै गए अवरुद्ध संसद भदौ १० गतेसम्म सुचारु हुने बताए ।