हामी सबैकाे संसारन्यूज

काठमाडौं । नेपाल चिकित्सक संघले देशका विभिन्न मेडिकल कलेजका रेजिडेन्ट तथा इन्टर्न चिकित्सकहरूले आफ्ना जायज माग राखेर गरिरहेको विरोध तथा आन्दोलनप्रति गम्भीर ध्यानाकर्षण भएको जनाएको छ। संघले आन्दोलनरत चिकित्सकका माग यथाशीघ्र सम्बोधन गर्न सरकार तथा सम्बन्धित मेडिकल कलेजसँग जोडदार माग गरेको छ।

संघले विहिबार जारी गरिएको प्रेस विज्ञप्तिमा उक्त विषयमा सरकार, मेडिकल कलेज, आन्दोलनरत चिकित्सक तथा अन्य सम्बन्धित सरोकारवालासँग निरन्तर छलफल र संवाद भइरहेको जनाएको छ।

आन्दोलन रहरभन्दा बाध्यताका कारण हुने भएकाले आन्दोलनका मागको यथोचित सुनुवाइ हुनु लोकतान्त्रिक समाजको आवश्यकता भएको संघले जनाएको छ। त्यसैले सम्बन्धित सबै पक्षलाई आपसी सहमति र संवादमार्फत समस्याको समाधान गर्न संघले आग्रह गरेको छ।

संघले यसअघि विभिन्न घटनाक्रममा भएका सहमतिहरूलाई समेत एकै ठाउँमा राखेर कानुनी हैसियतसहितको एकीकृत सहमति निर्माण गरी कार्यान्वयन गर्न सरकारसँग विशेष आग्रह गरेको छ।

समस्या समाधानका लागि सहजीकरण गर्दै सहमतिको वातावरण निर्माण गर्न नेपाल चिकित्सक संघ प्रतिबद्ध रहेको विज्ञप्तिमा उल्लेख छ।

संघका अध्यक्ष डा. बद्रि रिजाल र महासचिव डा. विश्वराज दवाडीद्वारा जारी विज्ञप्तिमा आन्दोलनरत चिकित्सकका जायज माग सम्बोधन गरी तत्काल सहमतिको वातावरण बनाउन सम्बन्धित सबै पक्षलाई आग्रह गरिएको छ।